baKHt ko roya kiye aur aashiyan dekha kiye

baḳht ko royā kiye aur āshiyāñ dekhā kiye

bijliyāñ girtī rahīñ ham be-zabāñ dekhā kiye

iltifāt-e-yār shakl-e-dushmanāñ dekhā kiye

raat bhar mahfil meñ sū-e-asmāñ dekhā kiye

kar diyā sayyād ne qaid-e-qafas to kyā huā

ham asīrī meñ bhī ḳhvāb-e-gulsitāñ dekhā kiye

patte patte se ḳhizāñ ne khīñch lī jān-e-bahār

gulsitāñ luTtā rahā aur bāġhbāñ dekhā kiye

ġhair us kī bazm meñ aate rahe jaate rahe

ham baḌī hasrat se rū-e-pāsbāñ dekhā kiye

rafta-rafta jaan bhī nazr-e-alam karnī paḌī

har masarrat jab nasīb-e-dushmanāñ dekhā kiye

miTne vāloñ ke liye asbāb kī hājat nahīñ

kyā kaheñ ham kyoñ kisī kā āstāñ dekhā kiye

baḳht ne kab ek hālat par hameñ rahne diyā

umr bhar ham inqilābāt-e-jahāñ dekhā kiye

un kī āñkhoñ un ke dil ko āfrīñ sad-āfrīñ

dost ban kar jo mirī barbādiyāñ dekhā kiye

vaj.h kuchh ho ham ne jab se aañkh kholī hai 'munīr'

roz-o-shab barbādī-e-hindostāñ dekhā kiye

baKHt ko roya kiye aur aashiyan dekha kiye

bijliyan girti rahin hum be-zaban dekha kiye

iltifat-e-yar shakl-e-dushmanan dekha kiye

raat bhar mahfil mein su-e-asman dekha kiye

kar diya sayyaad ne qaid-e-qafas to kya hua

hum asiri mein bhi KHwab-e-gulsitan dekha kiye

patte patte se KHizan ne khinch li jaan-e-bahaar

gulsitan luTta raha aur baghban dekha kiye

ghair us ki bazm mein aate rahe jate rahe

hum baDi hasrat se ru-e-pasban dekha kiye

rafta-rafta jaan bhi nazr-e-alam karni paDi

har masarrat jab nasib-e-dushmanan dekha kiye

miTne walon ke liye asbab ki hajat nahin

kya kahen hum kyon kisi ka aastan dekha kiye

baKHt ne kab ek haalat par hamein rahne diya

umr bhar hum inqilabaat-e-jahan dekha kiye

un ki aankhon un ke dil ko aafrin sad-afrin

dost ban kar jo meri barbaadiyan dekha kiye

wajh kuchh ho hum ne jab se aankh kholi hai 'munir'

roz-o-shab barbaadi-e-hindostan dekha kiye