bal paDe chitwan pe abru tan ke KHanjar ho gae

bal paḌe chitvan pe abrū tan ke ḳhanjar ho ga.e

zikr-e-vasl aate hī vo jaame se bāhar ho ga.e

ban ga.e vo harf-e-matlab sun ke tasvīr-e-hayā

surḳh fart-e-sharm se ruḳhsār-e-anvar ho ga.e

jitne qatre āñsuoñ ke yād-e-dandāñ meñ gire

gauhar-e-ḳhush-āb āñkhoñ se nikal kar ho ga.e

ro diye fariyād par merī butān-e-sang-dil

mere nāloñ se pighal kar mom patthar ho ga.e

ik bahāna chāhiye un ko bigaḌne ke liye

maiñ ne zulfoñ kī balā.eñ liiñ mire sar ho ga.e

ho gayā badmast maiñ un se milāte hī nazar

dīda-e-maḳhmūr mere haq meñ sāġhar ho ga.e

ābla-pā.ī hamārī rang laa.ī dasht meñ

ḳhār-e-sahrā tishna-e-ḳhūñ ho ke nashtar ho ga.e

vo but-e-ā.īna-sīmā zīnat-e-pahlū hai 'nāz'

aaj to ham bhī nasībe ke sikandar ho ga.e

bal paDe chitwan pe abru tan ke KHanjar ho gae

zikr-e-wasl aate hi wo jame se bahar ho gae

ban gae wo harf-e-matlab sun ke taswir-e-haya

surKH fart-e-sharm se ruKHsar-e-anwar ho gae

jitne qatre aansuon ke yaad-e-dandan mein gire

gauhar-e-KHush-ab aankhon se nikal kar ho gae

ro diye fariyaad par meri butan-e-sang-dil

mere nalon se pighal kar mom patthar ho gae

ek bahana chahiye un ko bigaDne ke liye

main ne zulfon ki balaen lin mere sar ho gae

ho gaya badmast main un se milate hi nazar

dida-e-maKHmur mere haq mein saghar ho gae

aabla-pai hamari rang lai dasht mein

KHar-e-sahra tishna-e-KHun ho ke nashtar ho gae

wo but-e-aina-sima zinat-e-pahlu hai 'naz'

aaj to hum bhi nasibe ke sikandar ho gae