bala ki beDiyan ulfat mein pahnin jaan-e-man do do

balā kī beḌiyāñ ulfat meñ pahnīñ jān-e-man do do

dil-e-betāb apnā ek zulf-e-pur-shikan do do

kabhī is se tumheñ dekhūñ kabhī us se tumheñ dekhūñ

milī haiñ is liye āñkheñ mujhe ai jān-e-man do do

diye haiñ ek tauba kī sadā maiḳhāne ke dar par

kahīñ gardish meñ haiñ paimāna-e-tauba-shikan do do

na ghar raushan kabhī hogā na ik parvāna aa.egā

jalā.ūñ badle ik ke din ko sham-e-anjuman do do

idhar fariyād be-tāsīr udhar sīdhī nazar un kī

hamārī jaan ke ḳhvāhāñ hue nāvak-fagan do do

kahūñ maiñ kyā fasāna aap se farhād-o-majnūñ kā

bhaTakte phirte haiñ dasht-e-junūñ meñ be-vatan do do

tumhārī shoḳh āñkhoñ se bachānā us ko mushkil hai

hamārā tā.ir-e-dil ek hai nāvak-fagan do do

mire qalb-o-jigar ko dekh kar bismil koī bolā

taḌapte haiñ paḌe maqtal meñ be-gor-o-kafan do do

khilā.e husn ne kyā gul ki 'hāmid' ek muddat par

pa.e-shikva khule haiñ ab lab-e-ġhuncha-dahan do do

bala ki beDiyan ulfat mein pahnin jaan-e-man do do

dil-e-betab apna ek zulf-e-pur-shikan do do

kabhi is se tumhein dekhun kabhi us se tumhein dekhun

mili hain is liye aankhen mujhe ai jaan-e-man do do

diye hain ek tauba ki sada maiKHane ke dar par

kahin gardish mein hain paimana-e-tauba-shikan do do

na ghar raushan kabhi hoga na ek parwana aaega

jalaun badle ek ke din ko sham-e-anjuman do do

idhar fariyaad be-tasir udhar sidhi nazar un ki

hamari jaan ke KHwahan hue nawak-fagan do do

kahun main kya fasana aap se farhad-o-majnun ka

bhaTakte phirte hain dasht-e-junun mein be-watan do do

tumhaari shoKH aankhon se bachana us ko mushkil hai

hamara tair-e-dil ek hai nawak-fagan do do

mere qalb-o-jigar ko dekh kar bismil koi bola

taDapte hain paDe maqtal mein be-gor-o-kafan do do

khilae husn ne kya gul ki 'hamid' ek muddat par

pae-shikwa khule hain ab lab-e-ghuncha-dahan do do