balaen parda-e-simin pe jalwa-gar hongi

balā.eñ parda-e-sīmīñ pe jalva-gar hoñgī

na.ī kahānī kī buniyādeñ ḳhauf par hoñgī

phalegā aur abhī nā-rasā.ī kā gulshan

fuġhāñ kī Tahniyāñ kuchh aur bārvar hoñgī

chhiḌī to phir na rukegī hayātyātī jang

hamārī zindagiyāñ ḳhauf meñ basar hoñgī

jo aks-band karoge hamārī vahshatoñ ko

to zombie film se baḌh kar vo mushtahar hoñgī

nizām-e-dahr mashīnoñ ke haath meñ hogā

jadīd daur kī tahzībeñ be-bashar hoñgī

kabhī na faisla ho pā.egā kidhar jaa.eñ

nazar ke sāmne duniyā.eñ is qadar hoñgī

ham un meñ baiTh ke ghūmeñge kā.enātoñ meñ

na.ī savāriyāñ kirnoñ se tez-tar hoñgī

rahegā ab na kahīñ vaqt kā tasavvur bhī

tamām sā'ateñ be-shām-o-be-sahar hoñgī

jidhar ko baaġh the bāzār ban ga.e haiñ vahāñ

na jaane tum se mulāqāteñ ab kidhar hoñgī

vo TuuT jā.eñge jo haath tum jhaTak doge

vo phuuT jā.eñgī jo āñkheñ be-basar hoñgī

ḳhudā ke nuur se mahrūm haiñ jo tahzībeñ

vo kahkashāñ kī taraf āzim-e-safar hoñgī

aur ab to chāñd pe ābād-kārī hone lagī

chamaktī vādiyāñ insāñ kā mustaqar hoñgī

ye sab husūl-e-vasā.il kī dauḌ hai pyāre

na.ī laḌā.iyāñ mirrīḳh-o-māh par hoñgī

ye baat kyoñ nahīñ sochī clone-sāzoñ ne

ki is se mushkileñ insāñ ko kis qadar hoñgī

na ab udāsiyāñ hoñgī bikher kar ḳhud ko

na ab masarrateñ ḳhud ko sameT kar hoñgī

hamāre tajrabe auroñ ko fā.eda deñge

hamārī koshisheñ nākām bhī agar hoñgī

na sochā thā ye kabhī ḳhuld se nikalte hue

ki is se baḌh ke sazā.eñ to ḳhaak par hoñgī

jo haul-nāk haiñ parchhā.iyāñ yahāñ 'shāhid'

zarūr aur kahīñ jāzib-e-nazar hoñgī

balaen parda-e-simin pe jalwa-gar hongi

nai kahani ki buniyaaden KHauf par hongi

phalega aur abhi na-rasai ka gulshan

fughan ki Tahniyan kuchh aur barwar hongi

chhiDi to phir na rukegi hayatyati jang

hamari zindagiyan KHauf mein basar hongi

jo aks-band karoge hamari wahshaton ko

to zombie film se baDh kar wo mushtahar hongi

nizam-e-dahr mashinon ke hath mein hoga

jadid daur ki tahziben be-bashar hongi

kabhi na faisla ho paega kidhar jaen

nazar ke samne duniyaen is qadar hongi

hum un mein baiTh ke ghumenge kaenaton mein

nai sawariyan kirnon se tez-tar hongi

rahega ab na kahin waqt ka tasawwur bhi

tamam sa'aten be-sham-o-be-sahar hongi

jidhar ko bagh the bazar ban gae hain wahan

na jaane tum se mulaqaten ab kidhar hongi

wo TuT jaenge jo hath tum jhaTak doge

wo phuT jaengi jo aankhen be-basar hongi

KHuda ke nur se mahrum hain jo tahziben

wo kahkashan ki taraf aazim-e-safar hongi

aur ab to chand pe aabaad-kari hone lagi

chamakti wadiyan insan ka mustaqar hongi

ye sab husul-e-wasail ki dauD hai pyare

nai laDaiyan mirriKH-o-mah par hongi

ye baat kyon nahin sochi clone-sazon ne

ki is se mushkilen insan ko kis qadar hongi

na ab udasiyan hongi bikher kar KHud ko

na ab masarraten KHud ko sameT kar hongi

hamare tajrabe auron ko faeda denge

hamari koshishen nakaam bhi agar hongi

na socha tha ye kabhi KHuld se nikalte hue

ki is se baDh ke sazaen to KHak par hongi

jo haul-nak hain parchhaiyan yahan 'shahid'

zarur aur kahin jazib-e-nazar hongi