ban-bas hue jog liya yar ki KHatir

ban-bās hue jog liyā yaar kī ḳhātir

dukh sahne ko sukh-chain tajā yaar kī ḳhātir

sahtā huuñ sabhī jaur-o-jafā yaar kī ḳhātir

har tarah huuñ rāzī-ba-razā yaar kī ḳhātir

dil de diyā maiñ ne agar un ko to ajab kyā

karte haiñ sabhī shāh-o-gadā yaar kī ḳhātir

vo manzil-e-dushvār ho yā vādī-e-pur-ḳhār

tai kartā huuñ maiñ ābla-pā yaar kī ḳhātir

farmāte haiñ vo shikva-e-bedād-o-jafā par

karte haiñ sabhī ahl-e-vafā yaar kī ḳhātir

har ek se duniyā meñ kiyā tark-e-ta.alluq

apnoñ se bhī begāna huā yaar kī ḳhātir

marnā bhī pa.e-dost hayāt-e-abadī hai

har zahr-e-fanā āb-e-baqā yaar kī ḳhātir

jiinā paḌā mar mar ke mohabbat meñ 'shahīr' aah

jo kuchh na huā thā vo huā yaar kī ḳhātir

ban-bas hue jog liya yar ki KHatir

dukh sahne ko sukh-chain taja yar ki KHatir

sahta hun sabhi jaur-o-jafa yar ki KHatir

har tarah hun raazi-ba-raza yar ki KHatir

dil de diya main ne agar un ko to ajab kya

karte hain sabhi shah-o-gada yar ki KHatir

wo manzil-e-dushwar ho ya wadi-e-pur-KHar

tai karta hun main aabla-pa yar ki KHatir

farmate hain wo shikwa-e-bedad-o-jafa par

karte hain sabhi ahl-e-wafa yar ki KHatir

har ek se duniya mein kiya tark-e-talluq

apnon se bhi begana hua yar ki KHatir

marna bhi pae-dost hayat-e-abadi hai

har zahr-e-fana aab-e-baqa yar ki KHatir

jina paDa mar mar ke mohabbat mein 'shahir' aah

jo kuchh na hua tha wo hua yar ki KHatir