ban gai hai maut kitni KHush-ada mere liye

ban ga.ī hai maut kitnī ḳhush-adā mere liye

sar jhukā kar phuul karte haiñ duā mere liye

tum na murjhāo to kaliyo kal batā denā use

kuchh samajh kar khoī khoī hai sabā mere liye

maiñ to bas un ke hī rañg-o-nūr kā akkās thā

muztarib hai kyuuñ sitāroñ kī ziyā mere liye

merī hī ḳhātir thā ahd-e-tark-e-ārā.ish magar

phir vo aa.e haiñ kanār-e-ā.ina mere liye

jagmagā uThtī hai dil meñ ik muqaddas raushnī

jab nahīñ hotā kahīñ bhī aasrā mere liye

sochtā huuñ phir uThā luuñ barbat-e-kohna 'salām'

muntazir hai sher-o-naġhma kā ḳhudā mere liye

ban gai hai maut kitni KHush-ada mere liye

sar jhuka kar phul karte hain dua mere liye

tum na murjhao to kaliyo kal bata dena use

kuchh samajh kar khoi khoi hai saba mere liye

main to bas un ke hi rang-o-nur ka akkas tha

muztarib hai kyun sitaron ki ziya mere liye

meri hi KHatir tha ahd-e-tark-e-araish magar

phir wo aae hain kanar-e-aina mere liye

jagmaga uThti hai dil mein ek muqaddas raushni

jab nahin hota kahin bhi aasra mere liye

sochta hun phir uTha lun barbat-e-kohna 'salam'

muntazir hai sher-o-naghma ka KHuda mere liye