بن گئیں چھریاں ادائیں ناز خنجر ہو گیا

بن گئیں چھریاں ادائیں ناز خنجر ہو گیا

جان کا دشمن ہر اک انداز دلبر ہو گیا

جلوۂ بے تاب جب پردے سے باہر ہو گیا

عرصہ گاہ خلق اک میدان محشر ہو گیا

بت خفا ہو کر گئے احسان مجھ پر ہو گیا

یعنی اب یہ دل فقط اللہ کا گھر ہو گیا

اب ستائے گا مجھے کیا اضطراب زندگی

اب تو یہ دل رنج ناکامی کا خوگر ہو گیا

ولولہ تھا منزل الفت میں شوق دل کے ساتھ

ایک نے ہمت دلائی ایک رہبر ہو گیا

جلوہ گاہ ناز کی عشاق سے زینت بڑھی

یہ ہجوم اہل دید اک حسن منظر ہو گیا

نفس پر قابو اگر پایا تو سب کچھ پا لیا

جیت اس کی ہے کہ جس سے وہ مسخر ہو گیا

قیمت مے ہو گئی خوشترؔ ہماری زندگی

جو ہمارے پاس تھا سب نذر ساغر ہو گیا