ban ke ab jo sharif baiTha hai

ban ke ab jo sharīf baiThā hai

dil meñ us ke bhī thief baiThā hai

ye jo achchhā huā mire dil meñ

ek zauq-e-latīf baiThā hai

ruuh kī pāk-o-sāf masnad par

jism le kar kasīf baiThā hai

dil ke hujre meñ ek muddat se

koī saaya nahīf baiThā hai

mere dil ke hasīñ idāre kā

aaj ban kar vo chief baiThā hai

dil to baiThā hai is tarah goyā

jaise koī za.iif baiThā hai

qāfiye ke nahīf kandhe par

kaun le kar radīf baiThā hai

dekh kar aa.ina ye lagtā hai

mujh meñ merā harīf baiThā hai

in dinoñ jhuuT ke shikanje meñ

dab ke 'anvar-hanīf’ baiThā hai

ban ke ab jo sharif baiTha hai

dil mein us ke bhi thief baiTha hai

ye jo achchha hua mere dil mein

ek zauq-e-latif baiTha hai

ruh ki pak-o-saf masnad par

jism le kar kasif baiTha hai

dil ke hujre mein ek muddat se

koi saya nahif baiTha hai

mere dil ke hasin idare ka

aaj ban kar wo chief baiTha hai

dil to baiTha hai is tarah goya

jaise koi zaif baiTha hai

qafiye ke nahif kandhe par

kaun le kar radif baiTha hai

dekh kar aaina ye lagta hai

mujh mein mera harif baiTha hai

in dinon jhuT ke shikanje mein

dab ke 'anwar-hanif’ baiTha hai