ban ke kaisi misal aaya hai

ban ke kaisī misāl aaya hai

chashm-e-tar meñ gulāl aaya hai

zindagī zor se pakaḌ ham ko

ḳhud-kushī kā ḳhayāl aaya hai

dil-sarā.e meñ gahmā-gahmī hai

koī lashkar niDhāl aaya hai

saañs lenā bhī kaisī aadat hai

dhaḌkanoñ kā savāl aaya hai

ham bhī hote the kyā bulandī par

kyā hameñ bhī zavāl aaya hai

dil sukūnat se ḳhaak ho jaatā

kaun pāgal uchhāl aaya hai

phir vo Tahnī lagā ki TuuT ga.ī

phir vo jhoñkā sañbhāl aaya hai

us kī ḳhushbū chhupā ke rakkhī thī

koī jā kar nikāl aaya hai

ba.az vaqtoñ meñ apne uupar bhī

be-tahāsha malāl aaya hai

ḳhud ko jangal kiyā gayā pahle

phir vo chanchal ġhazāl aaya hai

ban ke kaisi misal aaya hai

chashm-e-tar mein gulal aaya hai

zindagi zor se pakaD hum ko

KHud-kushi ka KHayal aaya hai

dil-sarae mein gahma-gahmi hai

koi lashkar niDhaal aaya hai

sans lena bhi kaisi aadat hai

dhaDkanon ka sawal aaya hai

hum bhi hote the kya bulandi par

kya hamein bhi zawal aaya hai

dil sukunat se KHak ho jata

kaun pagal uchhaal aaya hai

phir wo Tahni laga ki TuT gai

phir wo jhonka sanbhaal aaya hai

us ki KHushbu chhupa ke rakkhi thi

koi ja kar nikal aaya hai

baz waqton mein apne upar bhi

be-tahasha malal aaya hai

KHud ko jangal kiya gaya pahle

phir wo chanchal ghazal aaya hai