ban ke kis shan se baiTha sar-e-mimbar waiz

ban ke kis shaan se baiThā sar-e-mimbar vaa.iz

naḳhvat-o-ujb hayūlā hai to paikar vaa.iz

tujh ko ḳhidmat milī rindoñ ko burā kahne kī

terī taqdīr meñ thā ye hī muqaddar vaa.iz

zaat se terī haiñ asbāb halāk-āmāda

suḳhan-e-ta.an hai goyā dam-e-ḳhanjar vaa.iz

khul gayā pech ki kyoñ bāñdhī hai dastār-e-girāñ

kuchh nahīñ farq ki hai saḳht subuk-sar vaa.iz

ye tumhārā qadd-e-ḳham-gashta hai shamshīr-e-sitam

saḳht-tar ho ga.e jitne hue lāġhar vaa.iz

jo tahī-dast nikāle ga.e mai-ḳhānoñ se

masjidoñ meñ vahī ban baiThe haiñ aksar vaa.iz

duur kar rīsh-e-hinā.ī ko na ho tā ye gumāñ

ki lagā muñh se hai jām-e-mai-e-ahmar vaa.iz

ye tumheñ ho ki paḌe daġhdaġha-e-hashr meñ ho

fāriġh-ul-bāl hai ek ek qalandar vaa.iz

pand-e-be-sūd se behtar thā ki yā-hū kahte

kaash insāñ ke evaz bante kabūtar vaa.iz

lo ḳhudā ḳhair kare aa.e yahāñ bhī hazrat

dekhnā yaaro khaḌe haiñ sar-e-mahshar vaa.iz

mai-kashoñ ke liye vā hai abhī bāb-e-tauba

kyoñ hue jaate ho māyūs barādar vaa.iz

nazar aaya ab use dahr kā faanī honā

dekh rone lagā bar-qabr-e-sikandar vaa.iz

āftāb-e-mai-e-pur-nūr kā to dekh faroġh

ban gayā ḳhatt-e-shu'ā'ī ḳhat-e-sāġhar vaa.iz

roz-o-shab qasd meñ masjid ke hai āvāra-ḳhirām

vahshat-e-zohd meñ kyā bhuul gayā ghar vaa.iz

sang-e-ka.aba ko to mānoge butoñ ko na sahī

mohtaram aap kī millat meñ hai patthar vaa.iz

ḳhū se baaz aa.eñ kahāñ karte haiñ talqīñ kalima

naza.a ke vaqt khaḌe haiñ sar-e-bistar vaa.iz

sūra-e-shams kī tafsīr kā kuchh lutf mile

dekh le kaash ke us kā ruḳh-e-anvar vaa.iz

qahr hai shakl-e-'abūs aur jabīn-e-pur-chīñ

ajab andāz kā insāñ hai sitamgar vaa.iz

lillahil-hamd ki har vaqt japā karte ho

ho gayā nām-e-butāñ tum ko bhī azbar vaa.iz

qadr maiḳhāne meñ pairāhan-e-sad-chāk kī hai

mo.atakif ka.abe meñ ho oḌh ke chādar vaa.iz

chup raho rahne bhī do sar-ba-garebāñ dam-e-chand

chhoḌ ke jaa.eñ kahāñ dāman-e-mahshar vaa.iz

jin ko ho ḳhātir-e-rindān-e-gunahgār kā paas

ai 'zakī' aise zamāne meñ haiñ kamtar vaa.iz

ban ke kis shan se baiTha sar-e-mimbar waiz

naKHwat-o-ujb hayula hai to paikar waiz

tujh ko KHidmat mili rindon ko bura kahne ki

teri taqdir mein tha ye hi muqaddar waiz

zat se teri hain asbab halak-amada

suKHan-e-tan hai goya dam-e-KHanjar waiz

khul gaya pech ki kyon bandhi hai dastar-e-giran

kuchh nahin farq ki hai saKHt subuk-sar waiz

ye tumhaara qadd-e-KHam-gashta hai shamshir-e-sitam

saKHt-tar ho gae jitne hue laghar waiz

jo tahi-dast nikale gae mai-KHanon se

masjidon mein wahi ban baiThe hain aksar waiz

dur kar rish-e-hinai ko na ho ta ye guman

ki laga munh se hai jam-e-mai-e-ahmar waiz

ye tumhein ho ki paDe daghdagha-e-hashr mein ho

farigh-ul-baal hai ek ek qalandar waiz

pand-e-be-sud se behtar tha ki ya-hu kahte

kash insan ke ewaz bante kabutar waiz

lo KHuda KHair kare aae yahan bhi hazrat

dekhna yaro khaDe hain sar-e-mahshar waiz

mai-kashon ke liye wa hai abhi bab-e-tauba

kyon hue jate ho mayus baradar waiz

nazar aaya ab use dahr ka fani hona

dekh rone laga bar-qabr-e-sikandar waiz

aaftab-e-mai-e-pur-nur ka to dekh farogh

ban gaya KHatt-e-shu'a'i KHat-e-saghar waiz

roz-o-shab qasd mein masjid ke hai aawara-KHiram

wahshat-e-zohd mein kya bhul gaya ghar waiz

sang-e-kaba ko to manoge buton ko na sahi

mohtaram aap ki millat mein hai patthar waiz

KHu se baz aaen kahan karte hain talqin kalima

naza ke waqt khaDe hain sar-e-bistar waiz

sura-e-shams ki tafsir ka kuchh lutf mile

dekh le kash ke us ka ruKH-e-anwar waiz

qahr hai shakl-e-'abus aur jabin-e-pur-chin

ajab andaz ka insan hai sitamgar waiz

lillahil-hamd ki har waqt japa karte ho

ho gaya nam-e-butan tum ko bhi azbar waiz

qadr maiKHane mein pairahan-e-sad-chaak ki hai

moatakif kabe mein ho oDh ke chadar waiz

chup raho rahne bhi do sar-ba-gareban dam-e-chand

chhoD ke jaen kahan daman-e-mahshar waiz

jin ko ho KHatir-e-rindan-e-gunahgar ka pas

ai 'zaki' aise zamane mein hain kamtar waiz