ban-sanwar kar jab kabhi wo gulsitan mein aa gae

ban-sañvar kar jab kabhī vo gulsitāñ meñ aa ga.e

aur nasrīñ lāla-o-sarv-o-saman sharmā ga.e

koī aage hai ki pīchhe is se kuchh matlab nahīñ

ġhaur is par kījiye ki ham kahāñ tak aa ga.e

gul ke insāñ aur the aur aaj ke kuchh aur haiñ

aaj ke insāñ ko dekho mehr-o-mah par chhā ga.e

jab bhī aa.ī koī mushkil ham hue sīna-sipar

aur hoñge mushkiloñ meñ phañs ke jo ghabrā ga.e

dāstān-e-ishq meñ aayā thā ik aisā maqām

baat merī ho rahī thī aur vo sharmā ga.e

dosto yād-e-ilāhī aisī manzil hai jahāñ

pā ga.e vo kho ga.e jo kho ga.e vo pā ga.e

jā ke 'bismil' manzil-e-jānāñ meñ ḳhud-rafta na ho

ye vo manzil hai jahāñ pā-e-ḳhirad tharrā ga.e

ban-sanwar kar jab kabhi wo gulsitan mein aa gae

aur nasrin lala-o-sarw-o-saman sharma gae

koi aage hai ki pichhe is se kuchh matlab nahin

ghaur is par kijiye ki hum kahan tak aa gae

gul ke insan aur the aur aaj ke kuchh aur hain

aaj ke insan ko dekho mehr-o-mah par chha gae

jab bhi aai koi mushkil hum hue sina-sipar

aur honge mushkilon mein phans ke jo ghabra gae

dastan-e-ishq mein aaya tha ek aisa maqam

baat meri ho rahi thi aur wo sharma gae

dosto yaad-e-ilahi aisi manzil hai jahan

pa gae wo kho gae jo kho gae wo pa gae

ja ke 'bismil' manzil-e-jaanan mein KHud-rafta na ho

ye wo manzil hai jahan pa-e-KHirad tharra gae