bana ke aaina-e-tasawwur jahan dil-e-dagh-dar dekha

banā ke ā.īna-e-tasavvur jahāñ dil-e-dāġh-dār dekhā

firāq meñ lutf-e-vasl paayā ḳhizāñ meñ rañg-e-bahār dekhā

tamām kāmoñ kā rāste par hamesha dār-o-madār dekhā

fasād tīnat meñ jin kī paayā har ek sohbat meñ ḳhaar dekhā

sambhālā jis din se hosh ham ne vatan ko kul chand baar dekhā

na kī azīzoñ kī ġham-gusārī na phir ke apnā dayār dekhā

hue jo mānūs kaj-ravī se phire rah-e-sidq-o-rāstī se

na baiThe ik roz vo ḳhushī se na kuchh ba-juz intishār dekhā

bisāt-e-aish-o-tarab hai barham ye hai nasheb-o-farāz-e-ālam

piyāda haiñ un ko dekhte ham jinheñ hamesha savār dekhā

paḌī hai pīchhe kuchh aisī shāmat miTā rahe haiñ nishān-e-sarvat

bahut azīzoñ ko bahr-e-shohrat gañvāte apnā vaqār dekhā

jamā thā jis vaqt rañg-e-sohbat thā nek-o-bad meñ bhī lutf-e-ḳhullat

magar ḳhizāñ aa.ī yā qayāmat na phuul dekhā na ḳhaar dekhā

dil-o-jigar ko huā gavārā kahāñ surūr-e-sharāb-e-hastī

milā kabhī iztirār meñ ye kabhī use be-qarār dekhā

gayā vo daur-e-siyāh-mastī rahā faqat nām-e-mai-parastī

jo zo.af-e-pīrī meñ aañkh kholī to kuchh tabī.at pe baar dekhā

'habīb' ham ham-safīr-e-bulbul hamesha the gulshan-e-jahāñ meñ

vafā kī ḳhū bū ho jis meñ vo gul nazar na aayā hazār dekhā

bana ke aaina-e-tasawwur jahan dil-e-dagh-dar dekha

firaq mein lutf-e-wasl paya KHizan mein rang-e-bahaar dekha

tamam kaamon ka raste par hamesha dar-o-madar dekha

fasad tinat mein jin ki paya har ek sohbat mein KHar dekha

sambhaala jis din se hosh hum ne watan ko kul chand bar dekha

na ki azizon ki gham-gusari na phir ke apna dayar dekha

hue jo manus kaj-rawi se phire rah-e-sidq-o-rasti se

na baiThe ek roz wo KHushi se na kuchh ba-juz intishaar dekha

bisat-e-aish-o-tarab hai barham ye hai nasheb-o-faraaz-e-alam

piyaada hain un ko dekhte hum jinhen hamesha sawar dekha

paDi hai pichhe kuchh aisi shamat miTa rahe hain nishan-e-sarwat

bahut azizon ko bahr-e-shohrat ganwate apna waqar dekha

jama tha jis waqt rang-e-sohbat tha nek-o-bad mein bhi lutf-e-KHullat

magar KHizan aai ya qayamat na phul dekha na KHar dekha

dil-o-jigar ko hua gawara kahan surur-e-sharab-e-hasti

mila kabhi iztirar mein ye kabhi use be-qarar dekha

gaya wo daur-e-siyah-masti raha faqat nam-e-mai-parasti

jo zoaf-e-piri mein aankh kholi to kuchh tabiat pe bar dekha

'habib' hum ham-safir-e-bulbul hamesha the gulshan-e-jahan mein

wafa ki KHu bu ho jis mein wo gul nazar na aaya hazar dekha