bana ke ek nai manzil guzar gae hote

banā ke ik na.ī manzil guzar ga.e hote

jidhar koī nahīñ jaatā udhar ga.e hote

pa.e sukūñ na agar ham Thahar ga.e hote

to aaj tā-had-e-shams-o-qamar ga.e hote

ġham-e-hayāt se ham bhī jo Dar ga.e hote

to qaid-e-zīst meñ rah ke bhī mar ga.e hote

jo mai-kade meñ zarā tum Thahar ga.e hote

nazar ke zor se paimāne bhar ga.e hote

na lafz gul ko samajhte na ḳhaar ke ma.anī

bachā bachā ke jo dāman guzar ga.e hote

maiñ bevafā huuñ to vo kyuuñ nazar churā ke ga.e

zarā milā ke nazar se nazar ga.e hote

nasīm-e-sub.h ke jhoñke mirī taraf kyuuñ aa.e

jahāñ bahār hai gul haiñ udhar ga.e hote

batātā kaun nasheb-o-farāz-e-rāh-e-hayāt

jo sab kī tarah se ham bhī guzar ga.e hote

bahāna chāhiye gulshan meñ Darne vāloñ ko

na ḳhaar hote to phūloñ se Dar ga.e hote

maiñ aur kuchh nahīñ kahtā magar chaman vaalo

bahār aatī to gulshan sañvar ga.e hote

jo ittihād kī manzil pe hote ham 'shārib'

taġhayyurāt ke chehre utar ga.e hote

bana ke ek nai manzil guzar gae hote

jidhar koi nahin jata udhar gae hote

pae sukun na agar hum Thahar gae hote

to aaj ta-had-e-shams-o-qamar gae hote

gham-e-hayat se hum bhi jo Dar gae hote

to qaid-e-zist mein rah ke bhi mar gae hote

jo mai-kade mein zara tum Thahar gae hote

nazar ke zor se paimane bhar gae hote

na lafz gul ko samajhte na KHar ke mani

bacha bacha ke jo daman guzar gae hote

main bewafa hun to wo kyun nazar chura ke gae

zara mila ke nazar se nazar gae hote

nasim-e-subh ke jhonke meri taraf kyun aae

jahan bahaar hai gul hain udhar gae hote

batata kaun nasheb-o-faraaz-e-rah-e-hayat

jo sab ki tarah se hum bhi guzar gae hote

bahana chahiye gulshan mein Darne walon ko

na KHar hote to phulon se Dar gae hote

main aur kuchh nahin kahta magar chaman walo

bahaar aati to gulshan sanwar gae hote

jo ittihad ki manzil pe hote hum 'shaarib'

taghayyuraat ke chehre utar gae hote