bana ke toDti hai daere charagh ki lau

banā ke toḌtī hai dā.ere charāġh kī lau

bahā ke le ga.ī mujh ko kahāñ shu'ūr kī rau

banā chukā huuñ adhūre mujassame kitne

kahāñ vo naqsh jo takmīl-e-fan kā ho partav

vo moḌ mere safar kā hai nuqta-e-āġhāz

fareb-ḳhurda-e-manzil hue jahāñ rah-rau

larazte haiñ mirī mahrūm-e-ḳhvāb āñkhoñ meñ

bikhar chuke haiñ jo ḳhvāb un ke muntashir partav

bhaTak na jā.ūñ maiñ tashkīk ke añdheroñ meñ

laraz rahī hai mirī sham-e-etaqād kī lau

shab-e-darāz kā hai qissa muḳhtasar 'kaifī'

huī sahar ke ujāloñ meñ gum charāġh kī lau

bana ke toDti hai daere charagh ki lau

baha ke le gai mujh ko kahan shu'ur ki rau

bana chuka hun adhure mujassame kitne

kahan wo naqsh jo takmil-e-fan ka ho partaw

wo moD mere safar ka hai nuqta-e-aghaz

fareb-KHurda-e-manzil hue jahan rah-rau

larazte hain meri mahrum-e-KHwab aankhon mein

bikhar chuke hain jo KHwab un ke muntashir partaw

bhaTak na jaun main tashkik ke andheron mein

laraz rahi hai meri sham-e-etaqad ki lau

shab-e-daraaz ka hai qissa muKHtasar 'kaifi'

hui sahar ke ujalon mein gum charagh ki lau