band aankhon mein pighalti hui ek nazm ke rog

band āñkhoñ meñ pighaltī hui ik nazm ke rog

aur misroñ meñ chhupe dard hameñ jānte haiñ

yuuñ gale milte haiñ bichhḌā huā jaise mil jaa.e

tere kūche meñ pale dard hameñ jānte haiñ

ham se shāhān-e-mohabbat kā pata pūchhte ho

ishq-ābād ke be-dard hameñ jānte haiñ

ek mela sā lagā hotā hai yaar āḳhir-e-shab

dil kī sarhad pe khaḌe dard hameñ jānte haiñ

zard rut meñ bhī unheñ ham ne sambhāle rakkhā

tire hāthoñ se mile dard hameñ jānte haiñ

ham ne dekhe haiñ sazā kaaT ke jiite hue din

is havāle se to ye dard hameñ jānte haiñ

band aankhon mein pighalti hui ek nazm ke rog

aur misron mein chhupe dard hamein jaante hain

yun gale milte hain bichhDa hua jaise mil jae

tere kuche mein pale dard hamein jaante hain

hum se shahan-e-mohabbat ka pata puchhte ho

ishq-abaad ke be-dard hamein jaante hain

ek mela sa laga hota hai yar aaKHir-e-shab

dil ki sarhad pe khaDe dard hamein jaante hain

zard rut mein bhi unhen hum ne sambhaale rakkha

tere hathon se mile dard hamein jaante hain

hum ne dekhe hain saza kaT ke jite hue din

is hawale se to ye dard hamein jaante hain