band bahar se meri zat ka dar hai mujh mein

band bāhar se mirī zaat kā dar hai mujh meñ

maiñ nahīñ ḳhud meñ ye ik aam ḳhabar hai mujh meñ

ik ajab āmad-o-shud hai ki na maazī hai na haal

'jaun' barpā ka.ī nasloñ kā safar hai mujh meñ

hai mirī umr jo hairān tamāshā.ī hai

aur ik lamha hai jo zer-o-zabar hai mujh meñ

kyā tarastā huuñ ki bāhar ke kisī kaam aa.e

vo ik amboh ki bas ḳhāk-basar hai mujh meñ

Dūbne vāloñ ke dariyā mujhe pāyāb mile

us meñ ab Duub rahā huuñ jo bhañvar hai mujh meñ

dar-o-dīvār to bāhar ke haiñ Dhāne vaale

chāhe rahtā nahīñ maiñ par mirā ghar hai mujh meñ

maiñ jo paikār meñ andar kī huuñ be-teġh-o-zirah

āḳhirash kaun hai jo sīna-sipar hai mujh meñ

ma.arka garm hai be-taur sā koī har-dam

na koī teġh salāmat na sipar hai mujh meñ

zaḳhm-hā-zaḳhm huuñ aur koī nahīñ ḳhuuñ kā nishāñ

kaun hai vo jo mire ḳhuun meñ tar hai mujh meñ

band bahar se meri zat ka dar hai mujh mein

main nahin KHud mein ye ek aam KHabar hai mujh mein

ek ajab aamad-o-shud hai ki na mazi hai na haal

'jaun' barpa kai naslon ka safar hai mujh mein

hai meri umr jo hairan tamashai hai

aur ek lamha hai jo zer-o-zabar hai mujh mein

kya tarasta hun ki bahar ke kisi kaam aae

wo ek amboh ki bas KHak-basar hai mujh mein

Dubne walon ke dariya mujhe payab mile

us mein ab Dub raha hun jo bhanwar hai mujh mein

dar-o-diwar to bahar ke hain Dhane wale

chahe rahta nahin main par mera ghar hai mujh mein

main jo paikar mein andar ki hun be-tegh-o-zirah

aaKHirash kaun hai jo sina-sipar hai mujh mein

marka garm hai be-taur sa koi har-dam

na koi tegh salamat na sipar hai mujh mein

zaKHm-ha-zaKHm hun aur koi nahin KHun ka nishan

kaun hai wo jo mere KHun mein tar hai mujh mein