band hoti kitabon mein uDti hui titliyan Dal din

band hotī kitāboñ meñ uḌtī huī titliyāñ Daal diiñ

kis kī rasmoñ kī jaltī huī aag meñ laḌkiyāñ Daal diiñ

ḳhauf kaisā hai ye naam is kā kahīñ zer-e-lab bhī nahīñ

jis ne hāthoñ meñ mere hare kāñch kī chūḌiyāñ Daal diiñ

hoñT pyāse rahe hausle thak ga.e umr sahrā huī

ham ne paanī ke dhoke meñ phir ret par kashtiyāñ Daal diiñ

mausam-e-hijr kī kaisī saa.at hai ye dil bhī hairān hai

mere kānoñ meñ kis ne tirī yaad kī bāliyāñ Daal diiñ

band hoti kitabon mein uDti hui titliyan Dal din

kis ki rasmon ki jalti hui aag mein laDkiyan Dal din

KHauf kaisa hai ye nam is ka kahin zer-e-lab bhi nahin

jis ne hathon mein mere hare kanch ki chuDiyan Dal din

honT pyase rahe hausle thak gae umr sahra hui

hum ne pani ke dhoke mein phir ret par kashtiyan Dal din

mausam-e-hijr ki kaisi saat hai ye dil bhi hairan hai

mere kanon mein kis ne teri yaad ki baaliyan Dal din