بندہ عالم خراب ہوں میں

بندہ عالم خراب ہوں میں

زندگانی کا انقلاب ہوں میں

ہے وہ نور جمال کی تفسیر

اور سیہ سیہ بختیوں کا باب ہوں میں

زندگی نام ہے محبت کا

اپنے مقصد میں کامیاب ہوں میں

ہوں حقیقت سے اپنی کوسوں دور

سربسر وقف اضطراب ہوں میں

عمر دو روزہ مستعار ملی

بحر ہستی میں نقش آب ہوں میں

اک تماشہ ہے کار گاہ نظر

میں سمجھتا ہوں محو خواب ہوں میں

ہے مری زندگی کا راز یہی

غرق ہر موجۂ شراب ہوں میں

ہر رگ جاں ہے معصیت کا نشاں

اپنے اعمال کا حساب ہوں میں

الغرض کیا کہوں کہ کیا ہوں انیسؔ

زندگی کے لئے عذاب ہوں میں