بندہ پرور پہلے دل پر ہاتھ رکھ کر دیکھنا

بندہ پرور پہلے دل پر ہاتھ رکھ کر دیکھنا

پھر کسی کے ہاتھ میں پوشیدہ پتھر دیکھنا

اپنے مسلک میں نہیں یا اپنی قسمت میں نہیں

جانے والی ہر حسیں رت کو پلٹ کر دیکھنا

بے تغیر روز و شب میں بھی اچٹ جاتا ہے دل

ایک موسم دیکھنا اور زندگی بھر دیکھنا

آپ بھی کب سے مصر ہیں ترک رسم و راہ پر

ہم بھی رکھ لیں گے کبھی سینے پہ پتھر دیکھنا

کیا بتائیں اہل ساحل کا مقدر ہے یہی

بے بسی سے ڈوبنے والوں کا منظر دیکھنا

اس کو کیا کہئے بجز کوتاہی ذوق عمل

اپنے ہاتھوں کی لکیروں میں مقدر دیکھنا

سرسری سی اک نظر افضلؔ نہ ڈالو شعر پر

ہے نظر کا کام قطرے میں سمندر دیکھنا