banda-parwar pahle dil par hath rakh kar dekhna

banda-parvar pahle dil par haath rakh kar dekhnā

phir kisī ke haath meñ poshīda patthar dekhnā

apne maslak meñ nahīñ yā apnī qismat meñ nahīñ

jaane vaalī har hasīñ rut ko palaT kar dekhnā

be-taġhayyur roz-o-shab meñ bhī uchaT jaatā hai dil

ek mausam dekhnā aur zindagī bhar dekhnā

aap bhī kab se musir haiñ tark-e-rasm-o-rāh par

ham bhī rakh leñge kabhī siine pe patthar dekhnā

kyā batā.eñ ahl-e-sāhil kā muqaddar hai yahī

bebasī se Dūbne vāloñ kā manzar dekhnā

is ko kyā kahiye ba-juz kotāhī-e-zauq-e-amal

apne hāthoñ kī lakīroñ meñ muqaddar dekhnā

sarsarī sī ik nazar 'afzal' na Daalo sher par

hai nazar kā kaam qatre meñ samundar dekhnā

banda-parwar pahle dil par hath rakh kar dekhna

phir kisi ke hath mein poshida patthar dekhna

apne maslak mein nahin ya apni qismat mein nahin

jaane wali har hasin rut ko palaT kar dekhna

be-taghayyur roz-o-shab mein bhi uchaT jata hai dil

ek mausam dekhna aur zindagi bhar dekhna

aap bhi kab se musir hain tark-e-rasm-o-rah par

hum bhi rakh lenge kabhi sine pe patthar dekhna

kya bataen ahl-e-sahil ka muqaddar hai yahi

bebasi se Dubne walon ka manzar dekhna

is ko kya kahiye ba-juz kotahi-e-zauq-e-amal

apne hathon ki lakiron mein muqaddar dekhna

sarsari si ek nazar 'afzal' na Dalo sher par

hai nazar ka kaam qatre mein samundar dekhna