bandagi humne to ji se apni Thani aap ki

bandagī ham ne to jī se apnī Thānī aap kī

banda-parvar ḳhair aage qadr-dānī aap kī

thī jo vo laahī kī Topī zāfrānī aap kī

so hamāre paas hai ab tak nishānī aap kī

dam-ba-dam kah baiThnā bas jaao apnī un ke paas

kyuuñ nahīñ jaatī vo ab tak bad-gumānī aap kī

kyā kahūñ maare ḳhushī ke haal merā kyā huā

aamad aamad jo huī kal nā-gahānī aap kī

hai kisī se aaj va.ada kuchh ajī ḳhālī nahīñ

ye dhaḌe missī kī hoñToñ par jamānī aap kī

ham ne sau rāteñ jagā.īñ tab huā ye ittifāq

so usī din ko dharī thī niiñd aanī aap kī

mere haq meñ ab jo ye irshād farmāyā ki hai

ḳhuub yaañ manqūsh-ḳhātir jāñ-fishānī aap kī

lek maiñ oḌhūñ bichhā.ūñ yā lapeTūñ kyā karūñ

rūkhī phīkī aisī sūkhī mehrbānī aap kī

kyuuñ na ishq-allāh bolūñ hazrat-e-dil aap ko

peshvāoñ ne bhī apnī aan maanī aap kī

diid kar Daalā bas un se ālam-e-lāhūt sabt

jis ne lagdī bañk kī saafī meñ chhānī aap kī

apnī āñkhoñ meñ paḌī phirtī hai ab tak roz-o-shab

arsh par daatā vahī sūrat dikhānī aap kī

ai junūñ ustād bas ḳham Thoñk kar aa jā.iye

haañ ḳhalīfa ham bhī dekheñ pahalvānī aap kī

sadqa sadqa kyuuñ na ho jā.ūñ bhalā ġhash khā ke maiñ

dekh gadrā.ī huī uThtī javānī aap kī

sabza-āġhāzī so ye kuchh tispe aafat sādgī

qahr phir us baat par gardan hilānī aap kī

apnī āñkhoñ meñ tarāvaT aa ga.ī yak-bārgī

dekh kar ye lahlahe poshāk dhānī aap kī

kyuuñ na laḌkī sab kaheñ havvā tumheñ ai shaiḳh jiyu

hai jamūḳhī kī sī sūrat ye Darānī aap kī

gol pagḌī niilī luñgī mūñchh munDī takiya riish

phir vo rūmāl aur vo āḳh-thū nāsdānī aap kī

do gulābī lā ke saaqī ne kahā 'inshā' ko raat

zāfrānī merā hissa arġhavānī aap kī

bandagi hum ne to ji se apni Thani aap ki

banda-parwar KHair aage qadr-dani aap ki

thi jo wo lahi ki Topi zafrani aap ki

so hamare pas hai ab tak nishani aap ki

dam-ba-dam kah baiThna bas jao apni un ke pas

kyun nahin jati wo ab tak bad-gumani aap ki

kya kahun mare KHushi ke haal mera kya hua

aamad aamad jo hui kal na-gahani aap ki

hai kisi se aaj wada kuchh aji KHali nahin

ye dhaDe missi ki honTon par jamani aap ki

hum ne sau raaten jagain tab hua ye ittifaq

so usi din ko dhari thi nind aani aap ki

mere haq mein ab jo ye irshad farmaya ki hai

KHub yan manqush-KHatir jaan-fishani aap ki

lek main oDhun bichhaun ya lapeTun kya karun

rukhi phiki aisi sukhi mehrbani aap ki

kyun na ishq-allah bolun hazrat-e-dil aap ko

peshwaon ne bhi apni aan mani aap ki

did kar Dala bas un se aalam-e-lahut sabt

jis ne lagdi bank ki safi mein chhani aap ki

apni aankhon mein paDi phirti hai ab tak roz-o-shab

arsh par data wahi surat dikhani aap ki

ai junun ustad bas KHam Thonk kar aa jaiye

han KHalifa hum bhi dekhen pahalwani aap ki

sadqa sadqa kyun na ho jaun bhala ghash kha ke main

dekh gadrai hui uThti jawani aap ki

sabza-aghazi so ye kuchh tispe aafat sadgi

qahr phir us baat par gardan hilani aap ki

apni aankhon mein tarawaT aa gai yak-bargi

dekh kar ye lahlahe poshak dhani aap ki

kyun na laDki sab kahen hawwa tumhein ai shaiKH jiyu

hai jamuKHi ki si surat ye Darani aap ki

gol pagDi nili lungi munchh munDi takiya rish

phir wo rumal aur wo aaKH-thu nasdani aap ki

do gulabi la ke saqi ne kaha 'insha' ko raat

zafrani mera hissa arghawani aap ki