bani hui hain mere dil ki tarjuman aankhen

banī huī haiñ mire dil kī tarjumāñ āñkheñ

sunā rahī haiñ mohabbat kī dāstāñ āñkheñ

na thī zabāñ ko ijāzat ki hāl-e-dil kahtī

zabān-e-ashk se kartī rahīñ bayāñ āñkheñ

kabhī chhupī hai mohabbat ki maiñ chhupā letā

zabāñ jo band huī ban ga.iiñ zabāñ āñkheñ

banāo dāman-e-sāda pe in se gul-būTe

qubūl ho to karūñ nazr ḳhūñ-fishāñ āñkheñ

maiñ andalīb huuñ phūloñ kī diid merī hayāt

paroñ ko bāñdh na kar band bāġhbāñ āñkheñ

sharāfat-e-nigah-e-pāk kā hai nigarāñ dil

tahārat-e-dil-e-momin kī pāsbāñ āñkheñ

'urūj' baḌh ke karo pesh dil kā nazrāna

tumhīñ ko taak rahī haiñ vo dil-sitāñ āñkheñ

bani hui hain mere dil ki tarjuman aankhen

suna rahi hain mohabbat ki dastan aankhen

na thi zaban ko ijazat ki haal-e-dil kahti

zaban-e-ashk se karti rahin bayan aankhen

kabhi chhupi hai mohabbat ki main chhupa leta

zaban jo band hui ban gain zaban aankhen

banao daman-e-sada pe in se gul-buTe

qubul ho to karun nazr KHun-fishan aankhen

main andalib hun phulon ki did meri hayat

paron ko bandh na kar band baghban aankhen

sharafat-e-nigah-e-pak ka hai nigaran dil

tahaarat-e-dil-e-momin ki pasban aankhen

'uruj' baDh ke karo pesh dil ka nazrana

tumhin ko tak rahi hain wo dil-sitan aankhen