banne wali hi thi nafrat ki kahani duniya

banñe vaalī hī thī nafrat kī kahānī duniyā

dauḌ kar ahl-e-mohabbat ne bachā lī duniyā

is meñ bas aap hī bas aap nazar aate haiñ

maiñ ne duniyā se alag apnī banā.ī duniyā

aap ne apnā batāyā hai mujhe jis din se

de rahī hai mujhe aa aa ke badhā.ī duniyā

yuuñ hī karte nahīñ sab log mohabbat mujh se

pyaar kā dhan hai luTāyā to kamā.ī duniyā

ye hai girgiT kī tarah rañg badaltī apnā

laal piilī kabhī niilī kabhī dhānī duniyā

nafratoñ kā hai har ik samt añdherā phir bhī

pyaar se dekho nazar aa.egī pyārī duniyā

kabhī tanhā.ī meñ hañstā huuñ kabhī rotā huuñ

terī yādoñ kī hasīñ ek banā lī duniyā

tū mujhe bhuul na pā.egī qayāmat tak bhī

de ke jā.ūñgā tujhe aisī nishānī duniyā

maañ ke qadmoñ ko jo chūmā to lagā ye 'kāshif'

maañ ke qadmoñ meñ simaT aa.ī hai saarī duniyā

banne wali hi thi nafrat ki kahani duniya

dauD kar ahl-e-mohabbat ne bacha li duniya

is mein bas aap hi bas aap nazar aate hain

main ne duniya se alag apni banai duniya

aap ne apna bataya hai mujhe jis din se

de rahi hai mujhe aa aa ke badhai duniya

yun hi karte nahin sab log mohabbat mujh se

pyar ka dhan hai luTaya to kamai duniya

ye hai girgiT ki tarah rang badalti apna

lal pili kabhi nili kabhi dhani duniya

nafraton ka hai har ek samt andhera phir bhi

pyar se dekho nazar aaegi pyari duniya

kabhi tanhai mein hansta hun kabhi rota hun

teri yaadon ki hasin ek bana li duniya

tu mujhe bhul na paegi qayamat tak bhi

de ke jaunga tujhe aisi nishani duniya

man ke qadmon ko jo chuma to laga ye 'kashif'

man ke qadmon mein simaT aai hai sari duniya