barae-KHair shar se barsar-e-paikar ho jae

barā.e-ḳhair shar se barsar-e-paikār ho jaa.e

jise jiinā ho marne ke liye tayyār ho jaa.e

azā.em shal qavā maflūj dil be-kār ho jaa.e

agar āsāniyāñ hoñ zindagī dushvār ho jaa.e

jo rāh-e-haq meñ marne ke liye tayyār ho jaa.e

nazar meñ us kī bāzīcha farāz-e-dār ho jaa.e

agar shauq-e-shahādat ruuh meñ bedār ho jaa.e

jabīñ ḳhanjar-ba-kaf ho aur nazar talvār ho jaa.e

ināyat kī nazar dil par shah-e-abrār ho jaa.e

mirā tārīk kāshāna tajallī-zār ho jaa.e

vo dil jis ko ḳhayāl-e-mursal-e-muḳhtār ho jaa.e

tajallī-gāh-e-rahmat matla-e-anvār ho jaa.e

qayāmat kyā hai ai maulā qayāmat se agar pahle

hamārā aur un kā sāmnā ik baar ho jaa.e

tanaffus mushk-afshāñ hai takallum barq-e-jumbāñ hai

tabassum hai ki goyā nuur kī yalġhār ho jaa.e

siyāsat hai ye dil kī kyā ḳhabar ahl-e-siyāsat ko

ki kyūñ-kar parda-e-inkār meñ iqrār ho jaa.e

ye duniyā hai na ho nāzāñ nahīñ tū bā-ḳhabar nādāñ

ye yūsuf ke liye kab misr kā bāzār ho jaa.e

guzarnā hai mah-e-kan.āñ ko ik din chāh-e-kan.āñ se

jamāl ab phir barā.e imtihāñ tayyār ho jaa.e

zamāne kī qayādat paañv chūmegī tire vaa.iz

agar guftār ke Dhab par tirā kirdār ho jaa.e

supurd-e-ḳhāk karte haiñ shahīd-e-ishq ko yārab

ye daana ḳhaak meñ mil kar gul-o-gulzār ho jaa.e

sunā.egā kahāñ tak qissa-e-ġham 'rāz' rahne de

ye ġham Dar hai kahīñ dosh-e-falak par baar ho jaa.e

barae-KHair shar se barsar-e-paikar ho jae

jise jina ho marne ke liye tayyar ho jae

azaem shal qawa mafluj dil be-kar ho jae

agar aasaniyan hon zindagi dushwar ho jae

jo rah-e-haq mein marne ke liye tayyar ho jae

nazar mein us ki bazicha faraaz-e-dar ho jae

agar shauq-e-shahadat ruh mein bedar ho jae

jabin KHanjar-ba-kaf ho aur nazar talwar ho jae

inayat ki nazar dil par shah-e-abrar ho jae

mera tarik kashana tajalli-zar ho jae

wo dil jis ko KHayal-e-mursal-e-muKHtar ho jae

tajalli-gah-e-rahmat matla-e-anwar ho jae

qayamat kya hai ai maula qayamat se agar pahle

hamara aur un ka samna ek bar ho jae

tanaffus mushk-afshan hai takallum barq-e-jumban hai

tabassum hai ki goya nur ki yalghaar ho jae

siyasat hai ye dil ki kya KHabar ahl-e-siyasat ko

ki kyun-kar parda-e-inkar mein iqrar ho jae

ye duniya hai na ho nazan nahin tu ba-KHabar nadan

ye yusuf ke liye kab misr ka bazar ho jae

guzarna hai mah-e-kanan ko ek din chah-e-kanan se

jamal ab phir barae imtihan tayyar ho jae

zamane ki qayaadat panw chumegi tere waiz

agar guftar ke Dhab par tera kirdar ho jae

supurd-e-KHak karte hain shahid-e-ishq ko yarab

ye dana KHak mein mil kar gul-o-gulzar ho jae

sunaega kahan tak qissa-e-gham 'raaz' rahne de

ye gham Dar hai kahin dosh-e-falak par bar ho jae