baras ke bhi na mere kaam aa saki barish

baras ke bhī na mire kaam aa sakī bārish

abhī vo khul hī rahe the ki dhul ga.ī bārish

bujhā sakī na kisī taur merī ruuh kī pyaas

badan kī had se tajāvuz na kar sakī bārish

ajab nahīñ ki jigar tak utar ga.ī hotī

hamāre saath agar ḳhud bhī bhīgtī bārish

hai zikr-e-yār isī iltizām se rañgīñ

mahaktā jism javāñ raat be-ḳhudī bārish

hamīñ fareb-e-nazar kā shikār hote rahe

havā ke saath badaltī thī samt bhī bārish

kabhī to raaz diloñ ke TaToltī 'āsim'

kabhī to jhāñktī āñkhoñ meñ sar-phirī bārish

baras ke bhi na mere kaam aa saki barish

abhi wo khul hi rahe the ki dhul gai barish

bujha saki na kisi taur meri ruh ki pyas

badan ki had se tajawuz na kar saki barish

ajab nahin ki jigar tak utar gai hoti

hamare sath agar KHud bhi bhigti barish

hai zikr-e-yar isi iltizam se rangin

mahakta jism jawan raat be-KHudi barish

hamin fareb-e-nazar ka shikar hote rahe

hawa ke sath badalti thi samt bhi barish

kabhi to raaz dilon ke TaTolti 'asim'

kabhi to jhankti aankhon mein sar-phiri barish