baras raha hai faza se chaman mein KHauf-o-hiras

baras rahā hai fazā se chaman meñ ḳhauf-o-hirās

kalī kalī hai fasurda to phuul phuul udaas

na hausla na tamanna na shiddat-e-ehsās

batāo ahl-e-chaman kyā rahā tumhāre paas

bas ik nigāh-e-navāzish ye aisā shaad hai dil

ki jaise zarre ko mil jaa.e qismat-e-almās

azal meñ sab ko milā kuchh na kuchh ba-qadr-e-zarf

mirā nasīb milī mujh ko shiddat-e-ehsās

mire laboñ ke tabassum ko dekhne vaalo

jo ho sake to paḌho dil kā saf.ha-e-qirtās

is aa.ine meñ nazar aa.egā nizām-e-jahāñ

mirā kalām hai māhaul-o-vaqt kā ‘akkās

ḳhafā hue haiñ vo us baat par na jaane kyoñ

'razī' vo baat na thī jo qarīn-e-vahm-o-qayās

baras raha hai faza se chaman mein KHauf-o-hiras

kali kali hai fasurda to phul phul udas

na hausla na tamanna na shiddat-e-ehsas

batao ahl-e-chaman kya raha tumhaare pas

bas ek nigah-e-nawazish ye aisa shad hai dil

ki jaise zarre ko mil jae qismat-e-almas

azal mein sab ko mila kuchh na kuchh ba-qadr-e-zarf

mera nasib mili mujh ko shiddat-e-ehsas

mere labon ke tabassum ko dekhne walo

jo ho sake to paDho dil ka safha-e-qirtas

is aaine mein nazar aaega nizam-e-jahan

mera kalam hai mahaul-o-waqt ka ‘akkas

KHafa hue hain wo us baat par na jaane kyon

'razi' wo baat na thi jo qarin-e-wahm-o-qayas