برس رہا ہے فضا سے چمن میں خوف و ہراس

برس رہا ہے فضا سے چمن میں خوف و ہراس

کلی کلی ہے فسردہ تو پھول پھول اداس

نہ حوصلہ نہ تمنا نہ شدت احساس

بتاؤ اہل چمن کیا رہا تمہارے پاس

بس اک نگاہ نوازش یہ ایسا شاد ہے دل

کہ جیسے ذرے کو مل جائے قسمت الماس

ازل میں سب کو ملا کچھ نہ کچھ بقدر ظرف

مرا نصیب ملی مجھ کو شدت احساس

مرے لبوں کے تبسم کو دیکھنے والو

جو ہو سکے تو پڑھو دل کا صفحۂ قرطاس

اس آئینے میں نظر آئے گا نظام جہاں

مرا کلام ہے ماحول و وقت کا عکاس

خفا ہوئے ہیں وہ اس بات پر نہ جانے کیوں

رضیؔ وہ بات نہ تھی جو قرین وہم و قیاس