barbaad-e-mohabbat ka bas itna fasana hai

barbād-e-mohabbat kā bas itnā fasāna hai

rone ko nahīñ koī hañsne ko zamāna hai

kuchh kam na thā un kā ġham is par ġham-e-hastī bhī

mar-mar ke sahī lekin ye bojh uThānā hai

kal mujh ko thā ġham un kā ab un ko hai ġham merā

ik vo bhī zamāna thā ik ye bhī zamāna hai

yaktā.ī-o-kasrat meñ hai farq to bas itnā

simTe to mirā dil hai phaile to zamāna hai

allāh ajab shai hai ye jazb-e-mohabbat bhī

dekheñ vo kisī jānib dil merā nishāna hai

chhāyā huā har shai par aalam hai javānī kā

joban pe hai fasl-e-gul miTne kā zamāna hai

is dukh-bharī duniyā kī auqāt bas itnī hai

dekho to haqīqat hai samjho to fasāna hai

vo daur havas kā thā ye daur-e-mohabbat hai

jab ġham ko bhulāte the ab ḳhud ko bhulānā hai

baaqī na kahīñ dil meñ rah jaa.e koī armāñ

thoḌā sā bhaTak bhī leñ manzil pe to aanā hai

the 'ġhālib' o 'momin' bhī yaktā-e-jahāñ lekin

vo un kā zamāna thā ye merā zamāna hai

dam lene bhī de 'sāhir' zālim ye ġham-e-daurāñ

barbādī-e-ulfat par do ashk bahānā hai

barbaad-e-mohabbat ka bas itna fasana hai

rone ko nahin koi hansne ko zamana hai

kuchh kam na tha un ka gham is par gham-e-hasti bhi

mar-mar ke sahi lekin ye bojh uThana hai

kal mujh ko tha gham un ka ab un ko hai gham mera

ek wo bhi zamana tha ek ye bhi zamana hai

yaktai-o-kasrat mein hai farq to bas itna

simTe to mera dil hai phaile to zamana hai

allah ajab shai hai ye jazb-e-mohabbat bhi

dekhen wo kisi jaanib dil mera nishana hai

chhaya hua har shai par aalam hai jawani ka

joban pe hai fasl-e-gul miTne ka zamana hai

is dukh-bhari duniya ki auqat bas itni hai

dekho to haqiqat hai samjho to fasana hai

wo daur hawas ka tha ye daur-e-mohabbat hai

jab gham ko bhulate the ab KHud ko bhulana hai

baqi na kahin dil mein rah jae koi arman

thoDa sa bhaTak bhi len manzil pe to aana hai

the 'ghaalib' o 'momin' bhi yakta-e-jahan lekin

wo un ka zamana tha ye mera zamana hai

dam lene bhi de 'sahir' zalim ye gham-e-dauran

barbaadi-e-ulfat par do ashk bahana hai