barbaadiyon se shad hun unki KHushi bhi hai

barbādiyoñ se shaad huuñ un kī ḳhushī bhī hai

vaj.h-e-bahār-e-ġham mirī dīvāngī bhī hai

paiham taḌap se dard meñ kuchh tāzgī bhī hai

takmīl-e-iztirāb mirī zindagī bhī hai

zikr-e-sharāb-o-jām kiyā aur bahak gayā

vaa.iz mujhe batā ki kabhī tū ne pī bhī hai

tanhā mirā junūñ hī nahīñ bā.is-e-alam

banda-navāz kuchh to nazar aap kī bhī hai

rūh-e-umīd kaif-e-tajallī ḳhayāl-e-ġham

dil ke siyāh-ḳhāne meñ kuchh raushnī bhī hai

jis āstāñ pe rif.at-e-kaun-o-makāñ nisār

us āstāñ pe naqsh mirī bandagī bhī hai

maiñ kyā batā.ūñ kaif-e-mohabbat kī lazzateñ

kuchh hosh hai agar to mujhe be-ḳhudī bhī hai

'shāhid' nigāh-e-nāz kā tanhā qusūr kyā

taḌpāne vaalī tujh ko tirī shā.irī bhī hai

barbaadiyon se shad hun un ki KHushi bhi hai

wajh-e-bahaar-e-gham meri diwangi bhi hai

paiham taDap se dard mein kuchh tazgi bhi hai

takmil-e-iztirab meri zindagi bhi hai

zikr-e-sharab-o-jam kiya aur bahak gaya

waiz mujhe bata ki kabhi tu ne pi bhi hai

tanha mera junun hi nahin bais-e-alam

banda-nawaz kuchh to nazar aap ki bhi hai

ruh-e-umid kaif-e-tajalli KHayal-e-gham

dil ke siyah-KHane mein kuchh raushni bhi hai

jis aastan pe rifat-e-kaun-o-makan nisar

us aastan pe naqsh meri bandagi bhi hai

main kya bataun kaif-e-mohabbat ki lazzaten

kuchh hosh hai agar to mujhe be-KHudi bhi hai

'shahid' nigah-e-naz ka tanha qusur kya

taDpane wali tujh ko teri shairi bhi hai