barmala wo bhi agar hum ko dagha deta hai

barmalā vo bhī agar ham ko daġhā detā hai

dil-e-betāb use muñh pe sunā detā hai

vo sitam-kesh jab āzār nayā detā hai

ham samajhte haiñ ki ulfat kā sila detā hai

ishq kī aag to hai yuuñ bhī fanā kā paiġhām

dil-e-nā-fahm abas is ko havā detā hai

aazmā letā huuñ ahbāb ko gāhe-gāhe

varna dene ko to har chiiz ḳhudā detā hai

aur kuchh bhī ho magar is se to inkār nahīñ

ishq insān ko insān banā detā hai

maiñ jo piitā huuñ bilā-nāġha sharāb ai vaa.iz

kyuuñ tujhe chiḌ hai agar mujh ko ḳhudā detā hai

rahbarī vo hai ki āsūda-e-manzil ho koī

varna rasta to har ik shaḳhs batā detā hai

ab na kyuuñ naaz karūñ apnī vafā-keshī par

ab to ḳhud dost mujhe dād-e-vafā detā hai

sāqī-e-bazm kā ye ḳhaas karam hai 'sāhir'

dekhte hī mujhe nazroñ se pilā detā hai

barmala wo bhi agar hum ko dagha deta hai

dil-e-betab use munh pe suna deta hai

wo sitam-kesh jab aazar naya deta hai

hum samajhte hain ki ulfat ka sila deta hai

ishq ki aag to hai yun bhi fana ka paigham

dil-e-na-fahm abas is ko hawa deta hai

aazma leta hun ahbab ko gahe-gahe

warna dene ko to har chiz KHuda deta hai

aur kuchh bhi ho magar is se to inkar nahin

ishq insan ko insan bana deta hai

main jo pita hun bila-nagha sharab ai waiz

kyun tujhe chiD hai agar mujh ko KHuda deta hai

rahbari wo hai ki aasuda-e-manzil ho koi

warna rasta to har ek shaKHs bata deta hai

ab na kyun naz karun apni wafa-keshi par

ab to KHud dost mujhe dad-e-wafa deta hai

saqi-e-bazm ka ye KHas karam hai 'sahir'

dekhte hi mujhe nazron se pila deta hai