barpa tere visal ka tufan ho chuka

barpā tire visāl kā tūfān ho chukā

dil meñ jo baaġh thā vo bayābān ho chukā

paidā vajūd meñ har ik imkān ho chukā

aur maiñ bhī soch soch ke hairān ho chukā

pahle ḳhayāl sab kā thā ab apnī fikr hai

dāman kahāñ rahā jo garebān ho chukā

tum hī ne to ye dard diyā hai janāb-e-man

tum se hamāre dard kā darmān ho chukā

jo jashn-vashn hai vo hisār-e-havas meñ hai

ye aarzū kā shahr to vīrān ho chukā

auroñ se pūchhiye to haqīqat pata chale

tanhā.ī meñ to zaat kā irfān ho chukā

ik shahryār shahr-e-havas ko bhī chāhiye

aur maiñ bhī āshiqī se pareshān ho chukā

kitne maze kī baat hai aatī nahīñ hai iid

hālāñki ḳhatm arsa-e-ramazān ho chukā

mausam ḳhizāñ kā raas kab aayā hameñ 'shujā.a'

jab āmad-e-bahār kā elaan ho chukā

barpa tere visal ka tufan ho chuka

dil mein jo bagh tha wo bayaban ho chuka

paida wajud mein har ek imkan ho chuka

aur main bhi soch soch ke hairan ho chuka

pahle KHayal sab ka tha ab apni fikr hai

daman kahan raha jo gareban ho chuka

tum hi ne to ye dard diya hai janab-e-man

tum se hamare dard ka darman ho chuka

jo jashn-washn hai wo hisar-e-hawas mein hai

ye aarzu ka shahr to viran ho chuka

auron se puchhiye to haqiqat pata chale

tanhai mein to zat ka irfan ho chuka

ek shahryar shahr-e-hawas ko bhi chahiye

aur main bhi aashiqi se pareshan ho chuka

kitne maze ki baat hai aati nahin hai id

haalanki KHatm arsa-e-ramazan ho chuka

mausam KHizan ka ras kab aaya hamein 'shujaa'

jab aamad-e-bahaar ka elan ho chuka