barq milti hai na tinkon ko sharar milta hai

barq miltī hai na tinkoñ ko sharar miltā hai

dil ko barsāt meñ be-barg shajar miltā hai

us kī garmī-e-suḳhan raas na aa.ī us ko

ab vo miltā hai to kyā ḳhāk-basar miltā hai

sirf jiine kī havas saath rahe to shāyad

umr ke saath har ik gaam pe dar miltā hai

chaar dīvārī se shāyad nahīñ kuchh us ko mafar

ghar ke bāhar vo ba-andāz-e-digar miltā hai

maiñ use bhuul ke zinda rahūñ mumkin hai magar

mujh ko har moḌ pe us shaḳhs kā ghar miltā hai

jis ke kaase meñ anā hai koī taḳhlīq nahīñ

us ko har lafz meñ ik kāsa-e-sar miltā hai

dard ke saath juḌā hotā hai taḳhlīq kā karb

kuchh sivā mujh ko ba-hañgām-e-hunar miltā hai

ab shahādat sar-e-mimbar hī sahī aam huī

ab duāoñ ko kahāñ bāb-e-asar miltā hai

kal jahāñ laash paḌī thī koī iqbāl 'matīn'

aaj bhī kaun vahāñ ḳhuun meñ tar miltā hai

barq milti hai na tinkon ko sharar milta hai

dil ko barsat mein be-barg shajar milta hai

us ki garmi-e-suKHan ras na aai us ko

ab wo milta hai to kya KHak-basar milta hai

sirf jine ki hawas sath rahe to shayad

umr ke sath har ek gam pe dar milta hai

chaar diwari se shayad nahin kuchh us ko mafar

ghar ke bahar wo ba-andaz-e-digar milta hai

main use bhul ke zinda rahun mumkin hai magar

mujh ko har moD pe us shaKHs ka ghar milta hai

jis ke kase mein ana hai koi taKHliq nahin

us ko har lafz mein ek kasa-e-sar milta hai

dard ke sath juDa hota hai taKHliq ka karb

kuchh siwa mujh ko ba-hangam-e-hunar milta hai

ab shahadat sar-e-mimbar hi sahi aam hui

ab duaon ko kahan bab-e-asar milta hai

kal jahan lash paDi thi koi iqbaal 'matin'

aaj bhi kaun wahan KHun mein tar milta hai