barq-raftar wo yun jaan-e-jahan milte hain

barq-raftār vo yuuñ jān-e-jahāñ milte haiñ

ham jahāñ hote haiñ vo ham ko vahāñ milte haiñ

ġham ke maare to milā karte haiñ ham ko aksar

aaj ke daur meñ ġham-ḳhvār kahāñ milte haiñ

jo ki hote haiñ bahut mehr-o-mohabbat vaale

aise ahbāb zamāne meñ kahāñ milte haiñ

ḳhuun dil kā jo kiyā karte haiñ ānan-fānan

tez nashtar bhī vo qurb-e-rag-e-jāñ milte haiñ

qalb se hotī nahīñ jin kī zabāñ ko nisbat

aise jul-bāz bahut ham ko yahāñ milte haiñ

jo nahīñ jānte ā.īn-e-mohabbat kyā hai

ishq farmāte hue aise javāñ milte haiñ

jin ko aatā hai hunar hosh uḌā dene kā

ham ko aise bhī hasīnān-e-jahāñ milte haiñ

bhed fitrat ke sabhī ho nahīñ sakte zāhir

kuchh ayaañ hone pe bhī ham ko nihāñ milte haiñ

husn-o-ḳhūbī se jo chalte haiñ razā-e-haq par

haiñ vahī log jinheñ donoñ jahāñ milte haiñ

is tarah ke bhī hameñ milte haiñ ahbāb 'azīz'

ham se katrāte bahut haiñ vo jahāñ milte haiñ

barq-raftar wo yun jaan-e-jahan milte hain

hum jahan hote hain wo hum ko wahan milte hain

gham ke mare to mila karte hain hum ko aksar

aaj ke daur mein gham-KHwar kahan milte hain

jo ki hote hain bahut mehr-o-mohabbat wale

aise ahbab zamane mein kahan milte hain

KHun dil ka jo kiya karte hain aanan-fanan

tez nashtar bhi wo qurb-e-rag-e-jaan milte hain

qalb se hoti nahin jin ki zaban ko nisbat

aise jul-baz bahut hum ko yahan milte hain

jo nahin jaante aain-e-mohabbat kya hai

ishq farmate hue aise jawan milte hain

jin ko aata hai hunar hosh uDa dene ka

hum ko aise bhi hasinan-e-jahan milte hain

bhed fitrat ke sabhi ho nahin sakte zahir

kuchh ayan hone pe bhi hum ko nihan milte hain

husn-o-KHubi se jo chalte hain raza-e-haq par

hain wahi log jinhen donon jahan milte hain

is tarah ke bhi hamein milte hain ahbab 'aziz'

hum se katraate bahut hain wo jahan milte hain