barson ashkon se wuzu ka silsila karte rahe

barsoñ ashkoñ se vuzū kā silsila karte rahe

ham namāz-e-zindagī yuuñ bhī adā karte rahe

ham barābar dostī kā haq adā karte rahe

aur vo rozāna ik fitna khaḌā karte rahe

ham bayāñ ro ro ke dil kā mudda.ā karte rahe

ahl-e-mahfil muskurā kar vāh-vā karte rahe

kyā batā.eñ zindagānī ishq kī kaise kaTī

vo jafā karte rahe aur ham vafā karte rahe

umr-bhar ahl-e-vatan ne baat tak mujh se na kī

log merī qabr par phir jamghaTā karte rahe

chāñd ke mānind mukhḌe kī ziyā-pāshī ke gird

apnī zulf-e-ambarīñ se vo ghaTā karte rahe

ik nazar tū ne na dekhā bismilān-e-zār ko

log terā zikr-e-chashm-e-surma-sā karte rahe

vo jinheñ aa.ī mayassar ibtidā-e-māl-o-zar

ham pe har lahza sitam kī intihā karte rahe

ahl-e-dānish dekheñ un kī sādgī bechārgī

jo vasīloñ ke bharose par ḳhatā karte rahe

rahravo ruk jaao socho is pahelī kā javāb

rahnumāoñ ke nishāne kyuuñ ḳhatā karte rahe

kyā sunā.eñ jāñ-ba-lab qaumoñ kī bīmārī kā haal

dard baḌhtā hī gayā juuñ juuñ davā karte rahe

ho na paayā jāñ-ba-lab lākhoñ ġharīboñ kā ilaaj

ahl-e-sarvat tandurustoñ kī davā karte rahe

ho ga.e koshish meñ apnī kaam vaale kāmyāb

aur nākāra muqaddar kā gilā karte rahe

maiñ to bahr-e-ġham ke tūfānoñ se Takrātā rahā

log kuchh sāhil pe baiThe tabsira karte rahe

man turā haajī bagoyam tū morā haajī bago

shā.irān-e-pesha-var ye mashġhala karte rahe

shar-pasandoñ kī ri.āyat meñ faqīhān-e-kirām

zisht ko ḳhuub aur ravā ko nāravā karte rahe

sarguzisht apnī to saarī ye hai ai rabb-e-rahīm

darguzar kartā rahā tū ham ḳhatā karte rahe

raat chashm-e-'rāz' pahroñ ashk barsātī rahī

khel ke shauqīn ronā kirkirā karte rahe

barson ashkon se wuzu ka silsila karte rahe

hum namaz-e-zindagi yun bhi ada karte rahe

hum barabar dosti ka haq ada karte rahe

aur wo rozana ek fitna khaDa karte rahe

hum bayan ro ro ke dil ka muddaa karte rahe

ahl-e-mahfil muskura kar wah-wa karte rahe

kya bataen zindagani ishq ki kaise kaTi

wo jafa karte rahe aur hum wafa karte rahe

umr-bhar ahl-e-watan ne baat tak mujh se na ki

log meri qabr par phir jamghaTa karte rahe

chand ke manind mukhDe ki ziya-pashi ke gird

apni zulf-e-ambarin se wo ghaTa karte rahe

ek nazar tu ne na dekha bismilan-e-zar ko

log tera zikr-e-chashm-e-surma-sa karte rahe

wo jinhen aai mayassar ibtida-e-mal-o-zar

hum pe har lahza sitam ki intiha karte rahe

ahl-e-danish dekhen un ki sadgi bechaargi

jo wasilon ke bharose par KHata karte rahe

rahrawo ruk jao socho is paheli ka jawab

rahnumaon ke nishane kyun KHata karte rahe

kya sunaen jaan-ba-lab qaumon ki bimari ka haal

dard baDhta hi gaya jun jun dawa karte rahe

ho na paya jaan-ba-lab lakhon gharibon ka ilaj

ahl-e-sarwat tanduruston ki dawa karte rahe

ho gae koshish mein apni kaam wale kaamyab

aur nakara muqaddar ka gila karte rahe

main to bahr-e-gham ke tufanon se Takraata raha

log kuchh sahil pe baiThe tabsira karte rahe

man tura haji bagoyam tu mora haji bago

shairan-e-pesha-war ye mashghala karte rahe

shar-pasandon ki riayat mein faqihan-e-kiram

zisht ko KHub aur rawa ko narawa karte rahe

sarguzisht apni to sari ye hai ai rabb-e-rahim

darguzar karta raha tu hum KHata karte rahe

raat chashm-e-'raaz' pahron ashk barsati rahi

khel ke shauqin rona kirkira karte rahe