barson tum se baaten ki hain sadiyon naz uThaya hai

barsoñ tum se bāteñ kī haiñ sadiyoñ naaz uThāyā hai

lagtā hai ki maiñ ne tum ko janam janam se chāhā hai

dil kī dhaḌkan chaap tumhāre komal komal qadmoñ kī

ḳhushbū ḳhushbū yaad tumhārī phuul tumhārā saaya hai

rom rom meñ chandan chandan sargoshī sī mahkī thī

yā the nain tumhāre jhūTe yā merā man jhūTā hai

tere ruup meñ yā chandā kī kirneñ sej pe sotī haiñ

chāñdī kī shītal thālī meñ yā juuhī kā gajrā hai

in nazroñ ke bajroñ kā ruḳh būjheñ to kaise būjheñ

āñkheñ bhī utnī hī gahrī sāgar jitnā gahrā hai

dil yādoñ kī parchhā.īñ kā moh bhī shāyad jī na sake

sannāTe ke phaile haath meñ tanhā.ī kī rekhā hai

un kī kahānī to jamnī hai ang hañse yā nain hañseñ

ashkoñ ke afsāne ghaḌ le ye duniyā vo duniyā hai

barson tum se baaten ki hain sadiyon naz uThaya hai

lagta hai ki main ne tum ko janam janam se chaha hai

dil ki dhaDkan chap tumhaare komal komal qadmon ki

KHushbu KHushbu yaad tumhaari phul tumhaara saya hai

rom rom mein chandan chandan sargoshi si mahki thi

ya the nain tumhaare jhuTe ya mera man jhuTa hai

tere rup mein ya chanda ki kirnen sej pe soti hain

chandi ki shital thaali mein ya juhi ka gajra hai

in nazron ke bajron ka ruKH bujhen to kaise bujhen

aankhen bhi utni hi gahri sagar jitna gahra hai

dil yaadon ki parchhain ka moh bhi shayad ji na sake

sannaTe ke phaile hath mein tanhai ki rekha hai

un ki kahani to jamni hai ang hanse ya nain hansen

ashkon ke afsane ghaD le ye duniya wo duniya hai