bartar samaj se koi fankar bhi nahin

bartar samāj se koī fankār bhī nahīñ

fankār kyā jo sāhab-e-kirdār bhī nahīñ

har chand jāñ-balab haiñ sitam se sharīf log

laḌne ko zulm se koī tayyār bhī nahīñ

nasl-e-javāñ savār hai ḳhvāboñ kī naav meñ

us par sitam ki haath meñ patvār bhī nahīñ

khoTā Takā huuñ phir bhī kabhī kaam ā.ūñgā

mujh ko na pheñk itnā maiñ be-kār bhī nahīñ

urdu zabān kī maiñ vo kohna kitāb huuñ

jis kā vatan meñ koī ḳharīdār bhī nahīñ

ham ai 'shabāb' aise muqaddar kā kyā kareñ

ḳhvābīda jo nahīñ hai to bedār bhī nahīñ

bartar samaj se koi fankar bhi nahin

fankar kya jo sahab-e-kirdar bhi nahin

har chand jaan-balab hain sitam se sharif log

laDne ko zulm se koi tayyar bhi nahin

nasl-e-jawan sawar hai KHwabon ki naw mein

us par sitam ki hath mein patwar bhi nahin

khoTa Taka hun phir bhi kabhi kaam aaunga

mujh ko na phenk itna main be-kar bhi nahin

urdu zaban ki main wo kohna kitab hun

jis ka watan mein koi KHaridar bhi nahin

hum ai 'shabab' aise muqaddar ka kya karen

KHwabida jo nahin hai to bedar bhi nahin