bas aaftab ki tanwir jaisa lagta hai

bas āftāb kī tanvīr jaisā lagtā hai

kitābī chehra hai tasvīr jaisā lagtā hai

koī bhī dekhe to mab.hūt ho ke rah jaa.e

vo ruḳh to husn kī tafsīr jaisā lagtā hai

kisī bhī kaam kā vo mujh ko chhoḌtā hī nahīñ

ḳhayāl bhī tirā zanjīr jaisā lagtā hai

lakīr lambī sī kājal kī jis meñ hotī hai

vo gosha aañkh kā shamshīr jaisā lagtā hai

tumhāre kūche ke ma.alūm haiñ nasheb-o-farāz

mujhe vo apnī hī jāgīr jaisā lagtā hai

ajab kashish hai tire shahr meñ mujhe jānāñ

koī bhī rut ho vo kashmīr jaisā lagtā hai

vo chehra aisā hai āñkheñ Thahar hī jaatī haiñ

ki ik hasīn sī tahrīr jaisā lagtā hai

shab-e-firāq shab-e-vasl meñ badal jaanā

vo mere ḳhvāb kī ta.abīr jaisā lagtā hai

nigāh uThte hī dīdār terā ho jaanā

mirī duāoñ kī tāsīr jaisā lagtā hai

tirā ḳhayāl hī marham hai saare zaḳhmoñ kā

koī bhī zaḳhm ho iksīr jaisā lagtā hai

koī nishāñ hai na manzil kā hai pata 'anvar'

ye rāsta bhī to taqdīr jaisā lagtā hai

bas aaftab ki tanwir jaisa lagta hai

kitabi chehra hai taswir jaisa lagta hai

koi bhi dekhe to mabhut ho ke rah jae

wo ruKH to husn ki tafsir jaisa lagta hai

kisi bhi kaam ka wo mujh ko chhoDta hi nahin

KHayal bhi tera zanjir jaisa lagta hai

lakir lambi si kajal ki jis mein hoti hai

wo gosha aankh ka shamshir jaisa lagta hai

tumhaare kuche ke malum hain nasheb-o-faraaz

mujhe wo apni hi jagir jaisa lagta hai

ajab kashish hai tere shahr mein mujhe jaanan

koi bhi rut ho wo kashmir jaisa lagta hai

wo chehra aisa hai aankhen Thahar hi jati hain

ki ek hasin si tahrir jaisa lagta hai

shab-e-firaq shab-e-wasl mein badal jaana

wo mere KHwab ki tabir jaisa lagta hai

nigah uThte hi didar tera ho jaana

meri duaon ki tasir jaisa lagta hai

tera KHayal hi marham hai sare zaKHmon ka

koi bhi zaKHm ho iksir jaisa lagta hai

koi nishan hai na manzil ka hai pata 'anwar'

ye rasta bhi to taqdir jaisa lagta hai