bas ab humse dil-e-shorida-sar dekha nahin jata

bas ab ham se dil-e-shorīda-sar dekhā nahīñ jaatā

ye taḌpānā taḌapnā raat bhar dekhā nahīñ jaatā

hameñ tarkīb hī nazāra-e-ruḳh kī nahīñ aatī

ki vo haiñ dekhne kī shai magar dekhā nahīñ jaatā

ḳhudā jur.at na de mujh ko kisī din lab-kushā.ī kī

ki mujh se nāla-e-mahrūm-asar dekhā nahīñ jaatā

ḳhudā ne sharm rakh lī zauq-e-nazāra kī mahfil meñ

na jaane kyā sitam hotā agar dekhā nahīñ jaatā

kisī goshe meñ dil ke DhūñD us ke husn-e-yakjā ko

vo sham.a-e-shauq le kar dar-ba-dar dekhā nahīñ jaatā

baḌī muddat se paidā kar rahā huuñ shauq-e-nazzāra

ba-itmīnān-e-dil ab bhī udhar dekhā nahīñ jaatā

nahīñ mālūm 'qaisar' ishq hī itnā burā kyoñ hai

merī samt un se jab ki ik nazar dekhā nahīñ jaatā

bas ab hum se dil-e-shorida-sar dekha nahin jata

ye taDpana taDapna raat bhar dekha nahin jata

hamein tarkib hi nazara-e-ruKH ki nahin aati

ki wo hain dekhne ki shai magar dekha nahin jata

KHuda jurat na de mujh ko kisi din lab-kushai ki

ki mujh se nala-e-mahrum-asar dekha nahin jata

KHuda ne sharm rakh li zauq-e-nazara ki mahfil mein

na jaane kya sitam hota agar dekha nahin jata

kisi goshe mein dil ke DhunD us ke husn-e-yakja ko

wo shama-e-shauq le kar dar-ba-dar dekha nahin jata

baDi muddat se paida kar raha hun shauq-e-nazzara

ba-itminan-e-dil ab bhi udhar dekha nahin jata

nahin malum 'qaisar' ishq hi itna bura kyon hai

meri samt un se jab ki ek nazar dekha nahin jata