bas ab to ji mein yahi hai ki mar ke dekhte hain

bas ab to jī meñ yahī hai ki mar ke dekhte haiñ

kisī se ham bhī 'sanā' ishq kar ke dekhte haiñ

tirī hī diid kī pyāsī nahīñ hai ḳhalq-e-ḳhudā

mujhe bhī log tirī rahguzar ke dekhte haiñ

musāfiroñ ke muqaddar meñ ek shab hai bahut

vo mere saath sitāre sahar ke dekhte haiñ

kisī ko shahr meñ tere kahāñ hai fursat-e-dīd

ham aaj bhī tujhe aksar Thahar ke dekhte haiñ

tum apne ruup kā darpan hameñ bhī dikhlānā

tumhāre saath hī ham bhī sañvar ke dekhte haiñ

mah-o-nujūm-o-surayyā ko dekhnā hai fuzūl

tumhārī maañg meñ siñdūr bhar ke dekhte haiñ

uThā nashist se apnī to lams chhoḌ gayā

so vaañ nuqūsh bahisht-e-nazar ke dekhte haiñ

hue tulūa shabistāñ meñ us ke kyā kyā chāñd

sitāre band-e-qabā ke utar ke dekhte haiñ

ufuq ke paar sajā.ī ga.ī hai ḳhalvat-e-nāz

mah-o-nujūm pe ham paañv dhar ke dekhte haiñ

vo rafta rafta 'sanā' intizār karne lage

so aaj ham bhī zarā der kar ke dekhte haiñ

bas ab to ji mein yahi hai ki mar ke dekhte hain

kisi se hum bhi 'sana' ishq kar ke dekhte hain

teri hi did ki pyasi nahin hai KHalq-e-KHuda

mujhe bhi log teri rahguzar ke dekhte hain

musafiron ke muqaddar mein ek shab hai bahut

wo mere sath sitare sahar ke dekhte hain

kisi ko shahr mein tere kahan hai fursat-e-did

hum aaj bhi tujhe aksar Thahar ke dekhte hain

tum apne rup ka darpan hamein bhi dikhlana

tumhaare sath hi hum bhi sanwar ke dekhte hain

mah-o-nujum-o-surayya ko dekhna hai fuzul

tumhaari mang mein sindur bhar ke dekhte hain

uTha nashist se apni to lams chhoD gaya

so wan nuqush bahisht-e-nazar ke dekhte hain

hue tulua shabistan mein us ke kya kya chand

sitare band-e-qaba ke utar ke dekhte hain

ufuq ke par sajai gai hai KHalwat-e-naz

mah-o-nujum pe hum panw dhar ke dekhte hain

wo rafta rafta 'sana' intizar karne lage

so aaj hum bhi zara der kar ke dekhte hain