bas adab ki isi dastar se pahchana jaun

bas adab kī isī dastār se pahchānā jā.ūñ

ai ġhazal maiñ tire me.aar se pahchānā jā.ūñ

daulat-e-nām-o-nasab mujh ko bhī hāsil hai magar

chāhtā huuñ ki maiñ kirdār se pahchānā jā.ūñ

merī qīmat bhī koī aa ke lagā.e ik roz

aur maiñ garmī-e-bāzār se pahchānā jā.ūñ

mujh se tūfān ulajhne kī jasārat na kareñ

maiñ agar azm kī patvār se pahchānā jā.ūñ

zulm ke haath pe bai.at kā tasavvur ho to maiñ

sabr aur jur.at-e-inkār se pahchānā jā.ūñ

merī duniyā mujhe samjhe ki maiñ kyā huuñ 'vāsif'

jis meñ huuñ maiñ usī sansār se pahchānā jā.ūñ

bas adab ki isi dastar se pahchana jaun

ai ghazal main tere mear se pahchana jaun

daulat-e-nam-o-nasab mujh ko bhi hasil hai magar

chahta hun ki main kirdar se pahchana jaun

meri qimat bhi koi aa ke lagae ek roz

aur main garmi-e-bazar se pahchana jaun

mujh se tufan ulajhne ki jasarat na karen

main agar azm ki patwar se pahchana jaun

zulm ke hath pe baiat ka tasawwur ho to main

sabr aur jurat-e-inkar se pahchana jaun

meri duniya mujhe samjhe ki main kya hun 'wasif'

jis mein hun main usi sansar se pahchana jaun