bas ai falak nashat-e-dil ka intiqam ho chuka

bas ai falak nashāt-e-dil kā intiqām ho chukā

hañsā thā jis qadar kabhī ziyāda us se ro chukā

na zikr-e-imbisāt kar ki daur-e-aish ho chukā

ḳhushī kī fikr kis liye vo dil kahāñ jo kho chukā

ye ḳhanda-e-tarab-numā mubārak ahl-e-dahr ko

bahut zamāna ho gayā ki maiñ hañsī ko ro chukā

vafā jo zindagī meñ thī vahī hai bād-e-marg bhī

ye imtihān rah gayā vo imtihān ho chukā

na dam le ai sarishk-e-ġham tujhe qasam hai ishq kī

falak ko chhoḌtā hai kyuuñ agar mujhe Dubo chukā

rahe vo dil meñ muddatoñ magar sambhal sakā na maiñ

mizāj-e-husn-o-ishq ko bahut dinoñ samo chukā

ye āshiyāna-e-sitam chaman meñ ho to ḳhuub hai

ye jī meñ hai ki le uḌuuñ qafas tū merā ho chukā

ḳhabar nahīñ ye jāgnā hai ziist tak ki baad bhī

jo saath dil rahā yahī to maiñ lahad meñ so chukā

nikal ke rāh-e-ishq se kisī taraf chalūñ to kyā

kahāñ se lā.ūñ jaan o dil ye de chukā vo kho chukā

ye tū nahīñ ki vāda-e-vafā ko rauñdtā phire

ye maiñ huuñ sarfarosh-e-dil jo kah diyā vo ho chukā

ye 'sāqib' ek silk hai ḳhazāna-hā-e-rāz kī

guhar vo shāhvār haiñ jinheñ maiñ yuuñ piro chukā

bas ai falak nashat-e-dil ka intiqam ho chuka

hansa tha jis qadar kabhi ziyaada us se ro chuka

na zikr-e-imbisat kar ki daur-e-aish ho chuka

KHushi ki fikr kis liye wo dil kahan jo kho chuka

ye KHanda-e-tarab-numa mubarak ahl-e-dahr ko

bahut zamana ho gaya ki main hansi ko ro chuka

wafa jo zindagi mein thi wahi hai baad-e-marg bhi

ye imtihan rah gaya wo imtihan ho chuka

na dam le ai sarishk-e-gham tujhe qasam hai ishq ki

falak ko chhoDta hai kyun agar mujhe Dubo chuka

rahe wo dil mein muddaton magar sambhal saka na main

mizaj-e-husn-o-ishq ko bahut dinon samo chuka

ye aashiyana-e-sitam chaman mein ho to KHub hai

ye ji mein hai ki le uDun qafas tu mera ho chuka

KHabar nahin ye jagna hai zist tak ki baad bhi

jo sath dil raha yahi to main lahad mein so chuka

nikal ke rah-e-ishq se kisi taraf chalun to kya

kahan se laun jaan o dil ye de chuka wo kho chuka

ye tu nahin ki wada-e-wafa ko raundta phire

ye main hun sarfarosh-e-dil jo kah diya wo ho chuka

ye 'saqib' ek silk hai KHazana-ha-e-raaz ki

guhar wo shahwar hain jinhen main yun piro chuka