bas ek nazar chashm-e-ahu-e-KHutan walo

bas ek nazar chashm-e-āhū-e-ḳhutan vaalo

huuñ ġhuncha-e-pazhmurda shādāb chaman vaalo

haqdār-e-zakāt-e-husn arbāb-e-mohabbat haiñ

sone sī jabīñ vāloñ chāñdī se badan vaalo

ai kaash kahānī hī sun lo ġham-e-ulfat kī

shaffāf jabīnoñ par be-vaj.h shikan vaalo

haiñ dil meñ nihāñ kitne ḳhurshīd-numā chehre

maġhrūr na ho itnā sūraj kī kiran vaalo

har dāġh-e-jigar chamkā jab raat Dhalī apnī

tum yaad bahut aa.e ġhurbat meñ vatan vaalo

me.ār-e-suḳhan parkho ārā.ish-e-fan dekho

gaao ye ġhazal merī ai paak dahan vaalo

bātin bhī jo dikhlā de zāhir kī tarah ai barq

ā.īna koī aisā mumkin ho to banvā lo

bas ek nazar chashm-e-ahu-e-KHutan walo

hun ghuncha-e-pazhmurda shadab chaman walo

haqdar-e-zakat-e-husn arbab-e-mohabbat hain

sone si jabin walon chandi se badan walo

ai kash kahani hi sun lo gham-e-ulfat ki

shaffaf jabinon par be-wajh shikan walo

hain dil mein nihan kitne KHurshid-numa chehre

maghrur na ho itna suraj ki kiran walo

har dagh-e-jigar chamka jab raat Dhali apni

tum yaad bahut aae ghurbat mein watan walo

mear-e-suKHan parkho aaraish-e-fan dekho

gao ye ghazal meri ai pak dahan walo

baatin bhi jo dikhla de zahir ki tarah ai barq

aaina koi aisa mumkin ho to banwa lo