bas ek waqt ka KHanjar meri talash mein hai

bas ek vaqt kā ḳhanjar mirī talāsh meñ hai

jo roz bhes badal kar mirī talāsh meñ hai

ye aur baat ki pahchāntā nahīñ hai mujhe

sunā hai ek sitamgar mirī talāsh meñ hai

adhūre ḳhvāboñ se uktā ke jis ko chhoḌ diyā

shikan-nasīb vo bistar mirī talāsh meñ hai

ye mere ghar kī udāsī hai aur kuchh bhī nahīñ

diyā jalā.e jo dar par mirī talāsh meñ hai

aziiz huuñ maiñ mujhe kis qadar ki har ik ġham

tirī nigāh bachā kar mirī talāsh meñ hai

maiñ ek qatra huuñ merā alag vajūd to hai

huā kare jo samundar mirī talāsh meñ hai

vo ek saaya hai apnā ho yā parāyā ho

janam janam se barābar mirī talāsh meñ hai

maiñ devtā kī tarah qaid apne mandir meñ

vo mere jism se bāhar merī talāsh meñ hai

maiñ jis ke haath meñ ik phuul de ke aayā thā

usī ke haath kā patthar merī talāsh meñ hai

vo jis ḳhulūs kī shiddat ne maar Daalā 'nūr'

vahī ḳhulūs muqarrar mirī talāsh meñ hai

bas ek waqt ka KHanjar meri talash mein hai

jo roz bhes badal kar meri talash mein hai

ye aur baat ki pahchanta nahin hai mujhe

suna hai ek sitamgar meri talash mein hai

adhure KHwabon se ukta ke jis ko chhoD diya

shikan-nasib wo bistar meri talash mein hai

ye mere ghar ki udasi hai aur kuchh bhi nahin

diya jalae jo dar par meri talash mein hai

aziz hun main mujhe kis qadar ki har ek gham

teri nigah bacha kar meri talash mein hai

main ek qatra hun mera alag wajud to hai

hua kare jo samundar meri talash mein hai

wo ek saya hai apna ho ya paraya ho

janam janam se barabar meri talash mein hai

main dewta ki tarah qaid apne mandir mein

wo mere jism se bahar meri talash mein hai

main jis ke hath mein ek phul de ke aaya tha

usi ke hath ka patthar meri talash mein hai

wo jis KHulus ki shiddat ne mar Dala 'nur'

wahi KHulus muqarrar meri talash mein hai