bas gaya hai wo chand par ja kar

bas gayā hai vo chāñd par jā kar

aao milte haiñ us ke ghar jā kar

ruḳh badal kar qarīb se guzrā

baat kī us ne dūr-tar jā kar

vahī māhaul hai vahī kohrām

ham ne dekhā nagar nagar jā kar

tum ko jaane to duuñ savāl ye hai

aa.e vāpas na tum agar jā kar

vahī chehra thā shāhkār-e-azal

bas vahīñ ruk ga.ī nazar jā kar

āsmāñ hai hamāre paaoñ tale

kyoñ zamīñ se lage na sar jā kar

apne āñgan ko kah rahe ho ujaaḌ

dekh aa.e ho kis kā ghar jā kar

bas gaya hai wo chand par ja kar

aao milte hain us ke ghar ja kar

ruKH badal kar qarib se guzra

baat ki us ne dur-tar ja kar

wahi mahaul hai wahi kohram

hum ne dekha nagar nagar ja kar

tum ko jaane to dun sawal ye hai

aae wapas na tum agar ja kar

wahi chehra tha shahkar-e-azal

bas wahin ruk gai nazar ja kar

aasman hai hamare paon tale

kyon zamin se lage na sar ja kar

apne aangan ko kah rahe ho ujaD

dekh aae ho kis ka ghar ja kar