بس گلابی ہونٹوں کی مسکان لے کر آ گئے

بس گلابی ہونٹوں کی مسکان لے کر آ گئے

وقت رخصت ہم ترے ارمان لے کر آ گئے

مسکرا کر یوں تو ہم بچھڑے مگر ایسا لگا

سینہ میں گویا کوئی طوفان لے کر آ گئے

یہ بہی کھاتا محبت کا سمجھ سے تھا پرے

فائدہ ان کو دیا نقصان لے کر آ گئے

ان کے ہونٹوں کے تبسم کو چرایا ہم نے اور

اپنے نغموں کے لیے عنوان لے کر آ گئے

اجنبی اس شہر میں اک شخص اپنا سا لگا

اس کی آنکھوں میں بسی پہچان لے کر آ گئے

دوستی کے اپنے گلشن کو سجانے کے لیے

ساتھ اپنے پھول سا انسان لے کر آ گئے

اس جہاں کو جیتنے ہم گھر سے نکلے تھے مگر

اپنے جلتے خوابوں کا شمشان لے کر آ گئے

خود سے ہی رشتہ کوئی اب تک نبھا پائے نہیں

اور تری امید کا زندان لے کر آ گئے

پل دو پل ہی ہم ملے اور پھر بچھڑنا ہو گیا

اپنے گھر پہ یادوں کا سامان لے کر آ گئے

آزمایا گردشوں نے جب کبھی خودداری کو

کیسے کیسوں کا امتؔ احسان لے کر آ گئے