bas gulabi honTon ki muskan le kar aa gae

bas gulābī hoñToñ kī muskān le kar aa ga.e

vaqt-e-ruḳhsat ham tire armān le kar aa ga.e

muskurā kar yuuñ to ham bichhḌe magar aisā lagā

siine meñ goyā koī tūfān le kar aa ga.e

ye bahī-khātā mohabbat kā samajh se thā pare

fā.eda un ko diyā nuqsān le kar aa ga.e

un ke hoñToñ ke tabassum ko churāyā ham ne aur

apne naġhmoñ ke liye 'unvān le kar aa ga.e

ajnabī is shahr meñ ik shaḳhs apnā sā lagā

us kī āñkhoñ meñ basī pahchān le kar aa ga.e

dostī ke apne gulshan ko sajāne ke liye

saath apne phuul sā insān le kar aa ga.e

is jahāñ ko jītne ham ghar se nikle the magar

apne jalte ḳhvāboñ kā shamshān le kar aa ga.e

ḳhud se hī rishta koī ab tak nibhā paa.e nahīñ

aur tirī ummīd kā zindān le kar aa ga.e

pal do pal hī ham mile aur phir bichhaḌnā ho gayā

apne ghar pe yādoñ kā sāmān le kar aa ga.e

āzmāyā gardishoñ ne jab kabhī ḳhuddārī ko

kaise kaisoñ kā 'amit' ehsān le kar aa ga.e

bas gulabi honTon ki muskan le kar aa gae

waqt-e-ruKHsat hum tere arman le kar aa gae

muskura kar yun to hum bichhDe magar aisa laga

sine mein goya koi tufan le kar aa gae

ye bahi-khata mohabbat ka samajh se tha pare

faeda un ko diya nuqsan le kar aa gae

un ke honTon ke tabassum ko churaya hum ne aur

apne naghmon ke liye 'unwan le kar aa gae

ajnabi is shahr mein ek shaKHs apna sa laga

us ki aankhon mein basi pahchan le kar aa gae

dosti ke apne gulshan ko sajaane ke liye

sath apne phul sa insan le kar aa gae

is jahan ko jitne hum ghar se nikle the magar

apne jalte KHwabon ka shamshan le kar aa gae

KHud se hi rishta koi ab tak nibha pae nahin

aur teri ummid ka zindan le kar aa gae

pal do pal hi hum mile aur phir bichhaDna ho gaya

apne ghar pe yaadon ka saman le kar aa gae

aazmaya gardishon ne jab kabhi KHuddari ko

kaise kaison ka 'amit' ehsan le kar aa gae