bas ek jahan-e-tahayyur se aane wala hai

bas ik jahān-e-tahayyur se aane vaalā hai

vo ajnabī mujhe apnā banāne vaalā hai

gulāb sañg kī sūrat dikhāne vaalā hai

kahāñ kahāñ vo mujhe āzmāne vaalā hai

koī to dekhne vaalā hai merī āñkhoñ se

koī to hai jo tamāsha dikhāne vaalā hai

ye chāñd aur sitāre to ik bahāna haiñ

kuchh aur hai jo yahāñ jagmagāne vaalā hai

har ek jism yahāñ ruuh kī alāmat hai

ye regzār bhī naġhma sunāne vaalā hai

bas ik savāl kī taḳhlīq hai bashar jaise

kahāñ se aayā hai kis or jaane vaalā hai

use ḳhabar hai kahāñ raushnī kā māḳhaz hai

vo tīrgī meñ diloñ ko jalāne vaalā hai

amiir us kī amānat uThā nahīñ saktā

faqīr asal meñ us kā ḳhazāne vaalā hai

vo ek pyaas kā lamha jo mere andar hai

kabhī kabhī to samundar luTāne vaalā hai

vo ḳhāksār ko detā hai phuul hisse meñ

vo sang-zār meñ dariyā bahāne vaalā hai

bahut aziiz hai zer-o-zabar kā khel use

bujhā bujhā ke tamannā jagāne vaalā hai

vo ek gauhar-e-yaktā hai mere sāgar meñ

vo ek ashk ki āñkhoñ meñ aane vaalā hai

samar ko bāñdh ke rakhtā hai vo daraḳhtoñ par

jo pak gayā use nīche girāne vaalā hai

vo apne aap hī ghar lauT aa.egā 'ahmad'

kisī ko kaun hamesha bulāne vaalā hai

bas ek jahan-e-tahayyur se aane wala hai

wo ajnabi mujhe apna banane wala hai

gulab sang ki surat dikhane wala hai

kahan kahan wo mujhe aazmane wala hai

koi to dekhne wala hai meri aankhon se

koi to hai jo tamasha dikhane wala hai

ye chand aur sitare to ek bahana hain

kuchh aur hai jo yahan jagmagane wala hai

har ek jism yahan ruh ki alamat hai

ye regzar bhi naghma sunane wala hai

bas ek sawal ki taKHliq hai bashar jaise

kahan se aaya hai kis or jaane wala hai

use KHabar hai kahan raushni ka maKHaz hai

wo tirgi mein dilon ko jalane wala hai

amir us ki amanat uTha nahin sakta

faqir asal mein us ka KHazane wala hai

wo ek pyas ka lamha jo mere andar hai

kabhi kabhi to samundar luTane wala hai

wo KHaksar ko deta hai phul hisse mein

wo sang-zar mein dariya bahane wala hai

bahut aziz hai zer-o-zabar ka khel use

bujha bujha ke tamanna jagane wala hai

wo ek gauhar-e-yakta hai mere sagar mein

wo ek ashk ki aankhon mein aane wala hai

samar ko bandh ke rakhta hai wo daraKHton par

jo pak gaya use niche girane wala hai

wo apne aap hi ghar lauT aaega 'ahmad'

kisi ko kaun hamesha bulane wala hai