bas ek kashakash ka silsila hai azal se jo aaj tak raha hai

bas ik kashākash kā silsila hai azal se jo aaj tak rahā hai

falak kī munkir zamīñ rahī hai zamīñ kā munkir falak rahā hai

hai apne baazū pe naaz jin ko vo zor baazū kā aazmā leñ

vo saaz kī samt kyā baḌhegā jo haath shamshīr tak rahā hai

kahīñ na sailāb-e-karb ban kar ubal paḌe naġhma zindagī kā

haTā le ab apnā haath mutrib ki saaz kā dil dhaḌak rahā hai

tumhārī baḳhiya-garī musallam magar kahāñ tak rafū karoge

mire garebāñ kā haal ye hai jagah jagah se masak rahā hai

lagegī Thokar jo rāste meñ to ab na shāyad sañbhal sakeñge

ḳhayāl ik un kā ham-safar thā so vo bhī dāman jhaTak rahā hai

rivāyatoñ kī kamī nahīñ hai hidāyatoñ kī kamī nahīñ hai

qadam qadam pe khaḌe haiñ rahbar magar zamāna bhaTak rahā hai

mizāj teshoñ kā muzmahil hai uThāo sāz-e-shikasta 'ehsāñ'

sunāo maazī ke kuchh tarāne ki haal kā dil dhaḌak rahā hai

junūñ kā mausam jo aa rahā hai to aql kā dil dhaḌak rahā hai

idhar bhī dāman pe haiñ ḳharāsheñ udhar bhī āñchal masak rahā hai

idhar dil-e-muztarib ḳhafā hai udhar tabassum meñ bhī hayā hai

idhar ḳhamoshī ik iltijā hai udhar takallum bahak rahā hai

mirī nazar ko sunā rahā hai tumhārī be-tābiyoñ kā qissa

vo ek saaya ba-rang-e-sho.ala jo chilmanoñ se lapak rahā hai

havā se chilman sarak rahī hai nigāh merī ThiThak rahī hai

ki ab parā.ī samajh ke is ko tumhārā jalva jhijak rahā hai

tumhārī uljhan samajh rahā huuñ maiñ apne dil se ulajh rahā huuñ

ki rāste band ho chuke haiñ to phir ye kyoñ raah tak rahā hai

tum is taraf se guzar chukī ho magar galī gungunā rahī hai

tumhārī pāzeb kā vo naġhma fazā meñ ab tak khanak rahā hai

mai-e-mohabbat pilāne vaalī piyāla is kā chhalak na jaa.e

abhī to utrī nahīñ gale se abhī se 'ehsāñ' bahak rahā hai

bas ek kashakash ka silsila hai azal se jo aaj tak raha hai

falak ki munkir zamin rahi hai zamin ka munkir falak raha hai

hai apne bazu pe naz jin ko wo zor bazu ka aazma len

wo saz ki samt kya baDhega jo hath shamshir tak raha hai

kahin na sailab-e-karb ban kar ubal paDe naghma zindagi ka

haTa le ab apna hath mutrib ki saz ka dil dhaDak raha hai

tumhaari baKHiya-gari musallam magar kahan tak rafu karoge

mere gareban ka haal ye hai jagah jagah se masak raha hai

lagegi Thokar jo raste mein to ab na shayad sanbhal sakenge

KHayal ek un ka ham-safar tha so wo bhi daman jhaTak raha hai

riwayaton ki kami nahin hai hidayaton ki kami nahin hai

qadam qadam pe khaDe hain rahbar magar zamana bhaTak raha hai

mizaj teshon ka muzmahil hai uThao saz-e-shikasta 'ehsan'

sunao mazi ke kuchh tarane ki haal ka dil dhaDak raha hai

junun ka mausam jo aa raha hai to aql ka dil dhaDak raha hai

idhar bhi daman pe hain KHarashen udhar bhi aanchal masak raha hai

idhar dil-e-muztarib KHafa hai udhar tabassum mein bhi haya hai

idhar KHamoshi ek iltija hai udhar takallum bahak raha hai

meri nazar ko suna raha hai tumhaari be-tabiyon ka qissa

wo ek saya ba-rang-e-shoala jo chilmanon se lapak raha hai

hawa se chilman sarak rahi hai nigah meri ThiThak rahi hai

ki ab parai samajh ke is ko tumhaara jalwa jhijak raha hai

tumhaari uljhan samajh raha hun main apne dil se ulajh raha hun

ki raste band ho chuke hain to phir ye kyon rah tak raha hai

tum is taraf se guzar chuki ho magar gali gunguna rahi hai

tumhaari pazeb ka wo naghma faza mein ab tak khanak raha hai

mai-e-mohabbat pilane wali piyala is ka chhalak na jae

abhi to utri nahin gale se abhi se 'ehsan' bahak raha hai