بس اک تتلی اڑانا چاہتا ہوں

بس اک تتلی اڑانا چاہتا ہوں

فضاؤں میں ٹھکانا چاہتا ہوں

تری آنکھوں میں آنسو ہیں تو ہوں گے

تجھے میں کیا ہنسانا چاہتا ہوں

اگر بازار ہے دنیا تو اس سے

میں رشتہ تاجرانہ چاہتا ہوں

میں اپنی آنکھ کی خالی جگہ میں

نئی بستی بسانا چاہتا ہوں

یہ کیسی روشنی کی آرزو ہے

میں کس کا گھر جلانا چاہتا ہوں

سفر کا سلسلہ یوں ہی نہیں ہے

کوئی بہتر ٹھکانا چاہتا ہوں

جلے ہی جا رہا ہے کب سے عادلؔ

چراغ دل بجھانا چاہتا ہوں