bas isi ka gham nahin hai dil hai diwana tera

bas isī kā ġham nahīñ hai dil hai dīvāna tirā

banda-e-be-dām hai har-mast-o-farzāna tirā

maz.har-e-rang-e-haqīqat jab hai paimāna tirā

bā.is-e-sar-mastī-e-ālam hai mai-ḳhāna tirā

zikr kartī hai zabāñ aalam kī rozāna tirā

dil ne chup rah kar sunā āñkhoñ se afsāna tirā

gar yahī aalam rahā zauq-e-hijāb-e-husn kā

rāz-e-dil ifshā na kar de koī dīvāna tirā

mashrab-e-firdaus par tū bhī amal kar nāsehā

lā ḳhudā ke naam par bhar duuñ maiñ paimāna tirā

sāya-e-rahmat meñ ho jis kā jahān-e-ārzū

kyoñ valī kar de na us ko lutf-e-shāhāna tirā

dāstān-e-husn aur us kī numūd-e-dil-navāz

ḳhaak meñ mil kar bayāñ kartā hai parvāna tirā

'shād' saaqī kī nigāhoñ meñ raheñ har haal meñ

yuuñ gunahgāroñ ko hai mahbūb mai-ḳhāna tirā

bas isi ka gham nahin hai dil hai diwana tera

banda-e-be-dam hai har-mast-o-farzana tera

mazhar-e-rang-e-haqiqat jab hai paimana tera

bais-e-sar-masti-e-alam hai mai-KHana tera

zikr karti hai zaban aalam ki rozana tera

dil ne chup rah kar suna aankhon se afsana tera

gar yahi aalam raha zauq-e-hijab-e-husn ka

raaz-e-dil ifsha na kar de koi diwana tera

mashrab-e-firdaus par tu bhi amal kar naseha

la KHuda ke nam par bhar dun main paimana tera

saya-e-rahmat mein ho jis ka jahan-e-arzu

kyon wali kar de na us ko lutf-e-shahana tera

dastan-e-husn aur us ki numud-e-dil-nawaz

KHak mein mil kar bayan karta hai parwana tera

'shad' saqi ki nigahon mein rahen har haal mein

yun gunahgaron ko hai mahbub mai-KHana tera